Kundërspin: Transportimi i anëtarëve të sindikatës në Shkup paraqitet si spin për të shpifur kundër LSM-së
Përkatësia partiake dhe lufta sindikale nuk janë për nga përkufizimi në konflikt, por gjëja më e rëndësishme është respektimi i rregullave themelore të sindikalizmit, për ushtrimin e të drejtave të punëtorëve, që është një kategori e garantuar kushtetuese, dhe respektimi i dokumenteve të secilës sindikatë specifike. Pra, Georgievi i lartpërmendur mund të jetë jo vetëm ish-anëtar, por edhe aktual i LSDM-së, ashtu siç çdo anëtar tjetër i LSM-së mund të jetë anëtar dhe mbështetës i VMRO-DPMNE-së, Levicës, BDI-së, etj. Në fakt, shembuj të tillë ka në udhëheqjen e lartë të LSM-së dhe në të gjitha sindikatat e tjera më të mëdha dhe më të vogla, shkruan Vërtetmatësi.
Shkruar nga: Teofil Blazevski
Deputeti i VMRO-DPMNE-së, Brane Petrushevski, mbajti një konferencë për shtyp lidhur me karakterin dhe përkatësinë politike të Lidhjes së Sindikatave të Maqedonisë, duke i mbështetur tezat e tij me argumente që mund të konsiderohen si të shpifura:
Spin: LSM koordinohet dhe menaxhohet nga LSDM.
E gjithë logjistika për të ashtuquajturat protesta të LSM-së sigurohet nga LSDM. Dokumente nga denoncuesit kanë mbërritur te ne që tregojnë se kush janë personat përgjegjës për organizimin e logjistikës për protestat.
Ky është ai dokument.
Përgjegjës për organizimin e njerëzve dhe transportin nga Strumica dhe rajoni i Strumicës është Branko Georgiev. Ky është Branko Georgiev, ish-kreu i Ndërmarrjes Publike Komunale “Komunalec” Strumicë gjatë kohës së LSDM-së. Branko Georgiev, si përfaqësuesi kryesor i LSDM-së, tani është përfaqësuesi kryesor i LSM-së…
[Burimi: VMRO-DOMNE – Brane Petrushevski/Press – data: 12.03.2026]
Kundërspin: Shpjegimi i tezës së VMRO-DPMNE-së se përmes një dokumenti nga denoncuesit partia në pushtet vërteton se Lidhja e Sindikatave të Maqedonisë (LSM) është një zgjatim i LSDM-së, është në thelb një spin i plotë, pra një shtrembërim i së vërtetës.
VMRO-DPMNE ka sulmuar sindikatën më të madhe në vend me të njëjtën tezë disa herë, por në këtë tekst tema është dokumenti që tregoi dhe interpretimi i atij dokumenti nga deputeti Brane Petrushevski, në një konferencë për shtyp dje (12.03.2026), dhe përballë protestës së përgjithshme të planifikuar të LSM-së për të shtunën 14.03.2026, me kërkesën themelore për rritjen e pagës minimale në 600 euro.
Çfarë përmban dokumenti – prova nga “denoncuesi”
Nëse dikush e shqyrton me kujdes dokumentin e publikuar nga Petrushevski, i cili ishte provë se LSM nuk ekziston, por se LSDM qëndron në të vërtetë pas sindikatës, do të shohë se është një mjegullim. Domethënë, dokumenti nuk është gjë tjetër veçse një letër qarkore e rregullt nga selia e LSM-së drejtuar degëve sindikale në qytete të ndryshme të vendit, e cila shpjegon logjistikën e transportimit të anëtarëve të sindikatës (aktivë dhe të mëparshëm) në Shkup, ku po zhvillohet protesta.
Titulli i dokumentit të datës 10.03.2026 thotë qartë:
Për sindikatat e lidhura me LSM-në.
Subjekti: Njoftim për organizimin e transportit për Protestën e 14 Marsit në orën 12.05
Dokumenti përmend edhe disa emra të personave përgjegjës për organizimin e transportit, si dhe disa persona “për organizimin e punëtorëve që kanë nevojë për transport të organizuar” për të marrë pjesë në protestë nga territoret e disa qyteteve, përfshirë një farë Branko Georgiev, për të cilin Petrushevski thotë se ishte “ish-menaxher në Ndërmarrjen Publike Komunale “Komunalec” Strumicë gjatë kohës së LSDM” dhe se “si person kryesor në terren i LSDM-së, ai tani është personi kryesorë në terren i LSM-së”.
Sindikalizmi dhe përkatësitë politike
Georgiev mund të jetë jo vetëm ish-anëtar, por edhe antar aktual i LSDM-së, ashtu siç çdo anëtar tjetër i LSM-së mund të jetë anëtar dhe mbështetës i VMRO-DPMNE-së, Levicës, BDI-së, etj. Në fakt, shembuj të tillë ka në udhëheqjen e lartë të LSM-së dhe sindikatave të tjera të mëdha.
Kjo është kështu, sepse përkatësia partiake ose mbështetja dhe lufta sindikale nuk janë në konflikt sipas përkufizimit, por gjëja më e rëndësishme është respektimi i rregullave themelore të sindikalizmit, ushtrimin e të drejtave të punëtorëve, që është një kategori e garantuar kushtetuese, dhe respektimi i dokumenteve të secilës sindikatë specifike.
Pra, duke lënë mënjanë të gjitha argumentet për kërkesën e LSM-së për rritje të pagës minimale, nëse ishte logjike, jo logjike, nëse kompanitë mundeshin, nuk mundeshin, nëse duhej të kishte një ndërhyrje nga buxheti për t’i lehtësuar gjërat biznesit, nëse Këshilli Ekonomik dhe Social është një institucion trepalësh, jo dypartiak, nëse Kryeministri kishte të drejtë apo udhëheqësit e sindikatave…, nuk është aspak e rëndësishme për këtë tekst.
Argumentet e LSM-së konkretisht për këtë protestë u shpjeguan disa ditë më parë nga kreu i sindikatës më të madhe në vend. Dhe shpjegimi i VMRO-DPMNE-së më 12.03.2026, në mbështetje të tezës se LSM-së është një zgjatim i LSDM-së dhe se në të vërtetë nuk ekziston, përmes dokumentit të treguar nga denoncuesit, mund të vlerësohet si spin.