Komisionerja Marta Kos nesër do të jetë për vizitë zyrtare në Maqedoninë e Veriut
Komisionerja për zgjerimin e Bashkimit Evropian, Marta Kos, nesër do të jetë për vizitë zyrtare në Maqedoninë e Veriut, ku do të takohet edhe me kryeministrin dhe kryeparlamentarin, transmeton Portalb.mk.
Në këtë vizitë ajo pritet të zhvillojë takim me kryeministrin Hristijan Mickoski, kryetarin e Kuvendit të RMV-së, Afrim Gashin, ndërsa i shoqëruar me zëvendëskryeministrin Bekim Sali dhe ministren e arsimit, Vesna Janevska, do të vizitojnë konviktin studentor “Shën Naumi”, konvikt i rikonstruktuar me mjetet e BE-së.
Vizita te konvikti do të jetë në ora 14:50, ndërsa paraprakisht do të ketë konferencë për media me kryeministrin.
“Pas verës, Komsioni ka për qëllim të propozojë mënyra të reja që vendet-anëtare t’i afrojnë vendet-kandidate drejt BE-së para inkaudrimit. Por, është një pikë e rëndësishme. Kjo do të kërkojë përparim në negociatat për inkuadrim. Kjo mbetet prioritet. Pa një përparim të tillë, integrimi i mëtutjeshëm gradual do të jetë i kufizuar”, deklaroi eurokomisarja Marta Kos për MIA.
Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime. Qeveria aktuale në Shkup ka deklaruar se nuk do t’i bëjë këto ndryshime.
Me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.