Kambovski: Këshilli Gjyqësor po shqyrton rastet në të cilat ka vepruar gjykatësi Ristov
Këshilli Gjyqësor po shqyrton rastet në të cilat ka vepruar gjyqtari i apelit Gjoko Ristov, kundër të cilit u ngritën kallëzime penale pasi në shtëpinë e prindërve të tij në Negotinë u gjetën 350.000 euro, të cilat dyshohet se janë fituar në mënyrë të paligjshme, njoftoi kryetari i Këshillit Gjyqësor, Aleksandar Kambovski, transmeton Portalb.mk.
“Këshilli Gjyqësor do të kryejë kontrolle në Gjykatën e Apelit jo vetëm për gjyqtarin konkret, por për punën e të gjithë gjyqtarëve. Disa nga rastet në të cilat ka vepruar gjyqtari janë kontrolluar. Megjithatë, nuk kam të dhëna nëse janë zbuluar apo jo lëshime, sepse komisioni ende po i shqyrton rastet”, tha ai, duke iu përgjigjur pyetjeve gazetareske pas konferencës me temë “Forcimi i efikasitetit dhe pavarësisë së gjyqësorit në Maqedoni”.
Ai tha se këshilli po shqyrton gjashtë ose shtatë raste në të cilat ka vepruar gjyqtari, pas një ankese anonime.
“Po flasim për gjashtë ose shtatë raste. E mbajtëm ankesën anonime, sepse ishte nënshkruar nga një grup punonjësish, bashkëpunëtorësh ekspertë dhe këshilltarësh të Gjykatës së Apelit të Shkupit. Ishte pa nënshkrim, pa emra, dhe sipas ligjit, kjo mbahet anonime. Megjithatë, vendosëm të formojmë një grup për të kontrolluar këto raste. Ndërkohë, morëm një refuzim, gjithashtu nga një grup punonjësish, bashkëpunëtorësh ekspertë, se nuk e kanë paraqitur këtë ankesë. Edhe kjo ankesë është pa emra dhe mbiemra, por me nënshkrimin e tyre. Megjithatë, ne i vlerësojmë të dyja si anonime”, thotë Kambovski.
Ai pret që raporti nga Komisioni që po kontrollon këto raste të jetë gati këtë javë.
Ai njoftoi se së shpejti do të kontrollohet edhe e gjithë puna e Gjykatës së Apelit.
Më 20 janar të këtij viti, gjyqtari paraprak pranoi propozimin e Prokurorisë Themelore Publike për Ndjekjen e Krimit të Organizuar dhe Korrupsionit (PTHP NKOK) dhe urdhëroi që gjyqtari i apelit Gjoko Ristov të lihet në arrest shtëpiak.
Ai akuzohet për veprat penale të fitimit dhe fshehjes së paligjshme të pasurisë, sipas nenit 359-a, paragrafi 3, në lidhje me paragrafin 1 të Kodit Penal, si dhe pastrim parash dhe të ardhurave të tjera nga një vepër penale.
Përveç arrestit shtëpiak, Ristovit iu sekuestrua edhe pasaporta, si masë shtesë për të siguruar praninë e tij, e cila u kërkua edhe nga PTHP NKOK.
Me kërkesë të gjykatës, Këshilli Gjyqësor vendosi në seancë urgjente të heqë imunitetin e gjyqtarit të apelit dhe të japë miratimin për masat për të siguruar praninë e tij të propozuara nga prokuroria kompetente.