Është anuluar seanca gjyqësore ndaj ish drejtorit të Geriatrisë, Muhsin Arifi
Është anuluar seanca e parë kundër ish-drejtorit të Klinikës së Geriatrisë në Shkup, Muhsin Arifi, i cili akuzohet për marrje të ryshfetit nga një grua që dëshironte që një anëtar i familjes të pranohet në spital, raporton Alsat, transmeton Portalb.mk.
Gjykatësja Lenka Davitkova nga Gjykata Penale shtyu seancën e sotme për shkak të mungesës së avokatit të Arifit, i cili u soll në seancë nga burgu i Shuto Orizarës. Në sallë ishte i pranishëm edhe bashkëpunëtori i tij, kujdestari Blerim Amiti, i cili i ka marrë paratë në emër të Arifit. Bëhet fjalë për 20.000 euro. Seanca e radhës është caktuar për në fund të gushtit.
Prokuroria për Ndjekjen e Krimit të Organizuar dhe Korrupsionit më 4 korrik ngriti aktakuzë në Gjykatën Themelore Penale në Shkup kundër Arifit dhe bashkëpunëtorit të tij.
Sipas aktakuzës, drejtori kërkoi përfitim të konsiderueshëm financiar për veten e tij me qëllim miratimin e shtrimit në spital të një personi në gjendje të rëndë shëndetësore, që ishte detyra e tij zyrtare. Ai kërkoi paratë nga një dëshmitar i cili kishte lidhur marrëveshje për mbështetje të përjetshme me pacientin.
I pandehuri i dytë, duke përdorur ndikimin e tij tek drejtori, ndërmjetësoi dhe mori shumën e kërkuar për të kryer veprimin zyrtar. Ai u arrestua në vendngjarje nga policia ndërsa merrte një pjesë të shumës së rënë dakord në shumën prej 20,000 eurosh.
Së bashku me aktakuzën, Prokuroria paraqiti propozim për zgjatjen e masës së paraburgimit për dy të pandehurit, duke shpjeguar se rrethanat për shkak të të cilave u caktua fillimisht paraburgimi ende ekzistojnë dhe nuk ka kushte për përcaktimin e një mase më të butë.
Drejtori i Spitalit Geriatrik “13 Nëntori”, Muhsin Arifi dhe një person tjetër u arrestuan më 8 prill.
- LEXO: Prokuroria kërkoi paraburgim dhe nisi hetim ndaj drejtorit të Geriatrisë Muhsin Arifi dhe një personi tjetër
- LEXO: Prokuroria: Drejtori Muhsin Arifi kërkoi 100 mijë, më pas bëri pazar për 20 mijë euro ryshfet
- LEXO: Është arrestuar drejtori i një institucioni shëndetësor, dyshohet për ryshfet prej 20.000 euro