Ekziston zgjidhje për dhënien fund të certifikatave dhe diplomave në letër, vetëm duhet ta përdorim atë
Diplomat, vërtetimet, mirënjohjet, certifikatat dhe letrat e rekomandimit për punësim, shumë ngadalë i marrin qytetarët në labirintet administrative dhe nëse i humbasin, duhet të kalojnë sërish rrugën e mundimshme për t’u lëshuar të reja. Përveç kohës, procedura të tilla kushtojnë edhe nerva dhe financa, e problem i veçantë është digjitalizimi i arsimit të lartë në Maqedoni, shkruan Meta.mk, transmeton Portalb.mk.
Edhe përkundër asaj se në periudhën e kaluar është folur shumë për temën e digjitalizimit të të gjitha dokumenteve të lëshuara në arsimin e lartë, duhet theksuar se në Maqedoni ekziston një zgjidhje që mund të aplikohet për tejkalimin e këtij problemi me dokumente në letër. Platforma verify.it është produkt i zhvilluar nga Blokverse dhe Netcetera, për avantazhet e të cilit Meta.mk diskutoi me Vladimir Simjanoski nga Blokverse.
Siç shpjegon Simjanoski, Verify.it është krijuar për t’u integruar me sistemet ekzistuese të informacionit të lëshuesve të dokumenteve dhe për të optimizuar procesin.
“Me këtë ulen në mënyrë drastike kostot operative të lëshuesve. Nga ana tjetër, përdoruesit e fundit kursejnë shumë kohë sepse nuk duhet të shkojnë fizikisht te lëshuesi. Përveç kësaj, ata marrin një dokument që lehtë me një klikim mund të vërtetohet si autentik”, thotë Vladimir Simjanoski.
Ndryshe, krijuesit e platformës aktualisht janë të fokusuar në modernizimin e proceseve të dhënies së dokumenteve në arsimin e lartë.
“Qëllimi i platformës verify.it është që të mundësojë lëshimin e çdo lloj dokumenti (diplomë, transkripta digjitale, certifikatë studentore, rekomandime etj.) në mënyrë digjitale”, shpjegon Simjanoski.
Të gjitha dokumentet e lëshuara përmes kësaj platforme janë të noterizuara në një rrjet privat blockchain, i cili operohet nga organizata me një nivel të lartë besimi nga bota akademike apo institucionet qeveritare. Përjashtohet mundësia e falsifikimit të dokumenteve digjitale në këtë rast, ndryshe nga vepra e tilla penale të kryera nga individë me diploma, certifikata apo vërtetime në formë letre.
“Teknologjia ka karakteristika të tilla që çdo rekord është i pandryshueshëm dhe përpjekjet për malverzime nuk mund të fshihen”, shprehet decid Simjanoski.
Në këtë mënyrë, përveç kursimit të kohës për qytetarët dhe parave për botuesit, një tjetër avantazh është mundësia e verifikimit të dokumentit digjital vetëm me një klikim. Në të kundërt, certifikatat në letër, diplomat ose dokumente të tjera verifikohen manualisht dhe kjo procedurë mund të zgjasë deri në disa javë.
Simjanoski sqaron se platforma verify.it tashmë ka partneritet me Fakultetin e Shkencave Informatike dhe Inxhinieri Kompjuterike (FIShIIK) në UKM. FIShIIK së bashku me kompaninë Blokverse zbatojnë procesin e transformimit digjital të dokumenteve të tyre që lëshojnë për studentët, bazuar në platformën verify.it.
Nëpërmjet platformës së tyre, fakultetet mund t’u lëshojnë studentëve konfirmime digjitale të studentëve të regjistruar, dokumente digjitale për qëndrimin e studentëve jashtë vendit ose diploma të arsimit të lartë të përfunduar.
Lëshimi i dokumenteve digjitale në legjislacionin e Maqedonisë së Veriut rregullohet me Ligjin për dokumente elektronike, identifikim elektronik dhe shërbime konfidenciale. Tashmë disa vite më parë, brenda BE-së ekziston rregullorja eIDAS për identifikimin elektronik dhe shërbimet konfidenciale për transaksionet elektronike në tregun e vetëm evropian.
Vladimir Simjanoski shpjegon se Bashkimi Evropian aktualisht është duke punuar në një version të ri të eIDAS (2.0), i cili do të rregullojë lëshimin e dokumenteve duke përdorur teknologji të decentralizuara (blockchain). Maqedonia, si vend kandidat për anëtarësim në BE, pritet të ndjekë këtë rregullore evropiane pasi BE-ja të fillojë ta zbatojë atë.
Ai shton se mjafton të shikohen treguesit ekonomikë të vendeve ku digjitalizimi realisht u kuptua seriozisht dhe arriti të përmirësonte disa herë produktivitetin në terma afatmesëm, e me këtë edhe konkurrencën si vende në krahasim me pjesën tjetër të botës. Si shtet duhet të tregojmë se kemi kapacitet për modernizim, thotë Simjanoski.
Përndryshe, Meta.mk ka kohë që e përcjell nevojën për transformim digjital në arsim, me theks të veçantë në arsimin e mesëm dhe të lartë. Në mars të këtij viti organizuan edhe një debat publik me temën “Digjitalizimi në arsim”, ku studentët u ankuan se çështjet studentore të fakulteteve të tyre vazhdojnë të jenë vendi i rregullt ku ata humbin nervat për të marrë certifikata për përdorimin e transportit falas, vërtetime për indeksin e semestrave ose aplikimet për notim nga profesorët.
