Besoj se 8 maji do të jetë data për të dy ciklet zgjedhore, deklaroi ministri Lloga
Përfaqësuesit e koalicionit qeveritar mbeten në qëndrimin për mbajtjen e zgjedhjeve të rregullta parlamentare, në të njëjtën ditë me zgjedhjet presidenciale, ndërsa sipas informacioneve jozyrtare të ministrit të Drejtësisë, i cili është nga radhët e Aleancës për Shqiptarët Krenar Lloga, data 8 maj do të jetë data e mbajtjes së dy cikleve zgjedhore, raporton MIA.
“Jozyrtarisht e di që ajo datë do të jetë datë zyrtare. Gjithsesi, mazhoranca do të duhet të mbajë qëndrim këto ditë, ndërsa më pas edhe me opozitën dhe besoj se kjo do të jetë data për dy ciklet zgjedhore, tha Lloga i pyetur nga një gazetar nëse 8 maji do të jetë data e zgjedhjeve.
Edhe zëvendëskryeministri dhe ministri i Sistemit Politik dhe Marrëdhënieve ndërmjet Bashkësive, Artan Grubi, thotë se në maj ka hapësirë për të mbajtur zgjedhjet e rregullta.
“Mendoj se të gjitha partitë politike pajtohen që zgjedhjet të mbahen së bashku dhe të mos jenë të parakohshme, sepse në maj ka hapësirë për t’u mbajtur, sipas legjislacionit tonë, zgjedhje të rregullta, si presidenciale dhe parlamentare, dhe shpresoj që brenda pak ditësh do të merret një vendim i përbashkët për mbajtjen e këtyre zgjedhjeve”, tha Grubi.
Zëvendëskryeministri për Çështje Ekonomike, Fatmir Bytyqi, nga ana tjetër, thotë se LSDM mbetet në qëndrimin që më në fund pas shumë vitesh të ketë zgjedhje të rregullta parlamentare.
“Ne si Lidhje Socialdemokrate qëndrojmë se duhet të ketë zgjedhje të rregullta parlamentare, më në fund një herë pas një serie vitesh në vendin tonë duhet të ketë zgjedhje të rregullta parlamentare, çdo gjë tjetër është çështje diskutimi”, tha Bytyqi, i cili me Llogën dhe Grubin morën pjesë në Akademinë solemne me rastin e 115 vjetorit të Kongresit të Manastirit dhe Ditëve të Alfabetit të Gjuhës Shqipe, organizuar nga Qeveria.
Në pyetjen se a do të ketë lista të përbashkëta mes BDI-së, ASH-së dhe LSDM-së, të tre thonë se janë të hapur për një gjë të tillë dhe se po flitet për këtë.
“Fronti evropian është i hapur për të gjitha partitë politike që mbështesin rrugën evropiane të shtetit, qoftë në performancë të përbashkët apo në lista të përbashkëta është çështje marrëveshjeje. Ende nuk kemi marrëveshje partiake, koalicioni apo ndërpartiak për lista të përbashkëta, por të gjitha opsionet janë të hapura”, deklaroi Bytyqi lidhur me këtë çështje.
Sa i përket pyetjes se kush do të jetë kryeministri i ardhshëm ditëve të fundit, Grubi ka konfirmuar sërish se ai nuk do të jetë dhe se do të jetë dikush tjetër i propozuar nga Ali Ahmeti dhe BDI.
I pyetur nëse ASH-ja do të largohet nga koalicioni nëse nuk ka ndryshime kushtetuese, Lloga tha se atyre ndryshimeve duhet t’u jepet shpresa deri në fund dhe se Aleanca do të jetë aty deri në fund që ndryshimet kushtetuese të kenë sukses.
Kryetari i Kuvendit, Talat Xhaferi, në konferencë për media muajin e kaluar ka folur për datat e mundshme për shpalljen e zgjedhjeve presidenciale, si dhe për afatet. Ai ndau tre data të mundshme për raundin e parë dhe të dytë të zgjedhjeve.
Sipas tij, nga dita e shpalljes së zgjedhjeve deri në ditën e votimit duhet të kalojnë jo më pak se 70 ditë dhe jo më shumë se 90 ditë. Kështu, nëse raundi i parë i zgjedhjeve presidenciale mbahet më 14 mars, atëherë shpallja e zgjedhjet duhet të jenë më 4 janar 2024. Nëse janë më 24 prill në raundin e parë dhe 8 maj për raundin e dytë, atëherë shpallja e zgjedhjeve do të duhet të jetë më 27 shkurt, që siguron të paktën 70 ditë deri në zgjedhje.
Datat e mundshme sipas Xhaferit janë:
- Raundi i parë: më 14 mars, 28 mars, 11 prill dhe 25 prill.
- Raundi i dytë: 28 mars, 11 prill, 25 prill dhe 9 maj (datë kritike sepse inaugurimi do të duhet të jetë më 12 maj).
Zgjedhjet për president mbahen gjatë 60 ditëve të fundit të mandatit aktual të kreut të shtetit.