Akuza të reja mes VMRO-së dhe LSDM-së për tradhti dhe keqpërdorim të fondeve publike
Partitë më të mëdha maqedonase kanë përshkallëzuar retorikën, duke shkëmbyer akuza të rënda përmes komunikatave. Nga njëra anë, LSDM ka akuzuar liderin e VMRO-DPMNE, Hristijan Mickoski, se po nxit tensione artificiale dhe retorikë përçarëse ndaj opozitës dhe vendeve fqinje, përfshirë Bullgarinë, me qëllim, siç thuhet, të shmangë vëmendjen nga problemet ekonomike dhe mungesa e reformave. Sipas kësaj partie, akuzat për “tradhti” ndaj opozitës janë pjesë e një strategjie politike për të mbuluar dështimet në qeverisje dhe për të ruajtur kontrollin mbi pushtetin, transmeton Portalb.mk.
Në komunikatën e saj, LSDM përmend edhe lidhje të pretenduara politike dhe ekonomike rajonale, duke përfshirë figura si Viktor Orbán dhe Aleksandar Vuçiq, për të cilat pretendon se mund të jenë subjekt i hetimeve të ardhshme.
“Hristijan Mickoski, pa një zgjidhje për ekonominë, pa reforma për BE-në dhe pa asnjë vizion për të ardhmen e vendit, ka nisur një fushatë të re “tradhtarësh” dhe një konflikt artificial me Bullgarinë, për të mbrojtur veten dhe organizatën e tij kriminale VMRO. Paratë në buxhet për tendera kriminalë po zhduken ngadalë, qeveria po futet në borxhe çdo ditë, nuk ka rezultate në ekonomi, nuk ka reforma – kështu që e tëra çfarë mund të bëjë është të krijojë tensione dhe të fajësojë opozitën.Qeveria në Bullgari nuk është formuar dhe Mickoski tashmë po njofton një përkeqësim të marrëdhënieve dhe po dërgon mesazhe armiqësore ndaj një vendi fqinj nga i cili varet integrimi ynë në BE. Ai po i quan përsëri të gjithë në LSDM “tradhtarë”, thonë nga LSDM.
Nga ana tjetër, VMRO-DPMNE ka reaguar duke akuzuar LSDM-në dhe liderin e saj Venko Filipçe për, siç thuhet, politikë pa parime dhe lëshime të dëmshme ndaj interesave kombëtare, veçanërisht në raport me Bullgarinë. VMRO-DPMNE pretendon se retorika “pro-evropiane” e LSDM-së shërben si mbulesë për lidhje të dyshuara me figura dhe biznese me orientim pro-rus.
“SDS dhe Filipçe fshihen pas frazës “pro-evropiane”, ndërsa në praktikë ofrojnë një politikë lëshimesh pa parime, pa vija të kuqe dhe pa garanci për shtetin. Për Venko Filipçen dhe SDS-në, rruga evropiane është një alibi për të pranuar çdo gjë në dëm të interesave kombëtare, vetëm që SDS të mund të marrë pushtetin dhe Filipçe të mund të mbajë vendin në Bihaçka. Venko Filipçe, në një përpjekje për të ruajtur pozicionin e tij udhëheqës në SDS, po shtyn gjithnjë e më shumë politikën e lëshimeve pa kushte ndaj Bullgarisë”, thonë nga VMRO.
Në këtë kontekst, VMRO-DPMNE ka përmendur disa raste dhe emra të biznesmenëve, duke pretenduar për afera dhe dhënie të diskutueshme të shtetësisë dhe tenderëve gjatë qeverisjes së kaluar.
“Filipçe dhe SDS, si në të kaluarën ashtu edhe sot, ndërsa flasin për një rrugë pro-evropiane, bashkëpunojnë me biznesmenë që janë seriozisht të diskutueshëm, siç është rasti i biznesmenit pro-rus Aleksandar Onishçenko, të cilit iu dha shtetësia maqedonase, një njeri që iku nga Ukraina për shkak të pastrimit të parave dhe korrupsionit, dhe të cilin Zaev dhe Filipçe e pritën me entuziazëm. Një shembull tjetër është skandali me Borçe Markovski, konsulli nderi i Bjellorusisë, i cili merr dhjetëra tendera shtetërorë. Gjithsej 77, 66 prej të cilëve përmes EMV-së me vlerë 141 milionë euro, falë skemave me Zaev dhe Filipçe. Gjithashtu rasti i Miodrag Davidoviq – Daka, i cili është shumë i diskutueshëm. Vetëm një ditë pas formimit të qeverisë në vitin 2020, PDU në Tetovë po ndryshon. Qëllimi i Zaev dhe SDS ishte të mundësonin një projekt me vlerë 200 milionë euro me mbi 2,000 njësi banimi”, thonë nga VMRO.