Aksioni për sekuestrimin e 40 tonëve marijuanë në RMV vazhdon, por ende nuk ka të dyshuar apo të arrestuar
Aksioni i madh i Prokurorisë Themelore Publike për Ndjekjen e Krimit të Organizuar dhe Korrupsionit (PTHP NKOK) dhe Ministrisë së Brendshme (MPB) është ende në vazhdim, në të cilin deri më tani janë sekuestruar mbi 40 ton marihuanë nga disa persona juridikë në vend. Aksioni filloi pas sekuestrimit të 5 ton marihuanë në Serbinë fqinje, të cilën mediat lokale raportuan se kishte origjinë nga Maqedonia, transmeton Portalb.mk.
Për të përcaktuar një lidhje të mundshme midis rasteve dhe origjinës së marihuanës, PTHP NKOK thotë se është në komunikim me Prokurorinë për Krimin e Organizuar të Serbisë.
Lidhur me operacionin në të cilin u sekuestruan sasi rekord marihuane në vend, Prokuroria e Maqedonisë informon se po ndërmerren vazhdimisht aktivitete në bashkëpunim me Ministrinë e Brendshme dhe Komisionin për miratimin e kultivimit të kanabisit për qëllime mjekësore në kuadër Ministrisë së Shëndetësisë. Po merren në pyetje edhe dëshmitarët, me qëllim mbledhjen e provave dhe fakteve relevante për procedurën.
“Procedurat po zhvillohen në koordinim të vazhdueshëm me Prokurorinë Publike të Republikës së Maqedonisë, si dhe me prokuroritë e tjera publike me juridiksion vendor dhe faktik, të cilat merren me çështjet penale të përcaktuara në Ligjin për Kontrollin e Drogave Narkotike. Prokuroria, së bashku me institucionet kompetente, vazhdon të ndërmarrë veprime për sqarimin e plotë të rastit, për të cilin publiku do të informohet me kohë”, tha Prokuroria Publike e Maqedonisë.
Në veprimin e Prokurorisë Publike të Republikës së Maqedonisë dhe Ministrisë së Brendshme, deri më tani janë sekuestruar mbi 40 ton drogë në disa lokacione në Shkup dhe Strumicë.
Nga deklarata e Prokurorisë Publike të Republikës së Maqedonisë, mund të konkludohet se rasti është në fazën e hetimit paraprak. Nuk përmenden të dyshuar ose të ndaluar të mundshëm.
Mickoski: Nuk e di që marihuana e sekuestruar në Serbi ka dalë nga Maqedonia
Lidhur me lidhjen e mundshme të rasteve, si dhe dyshimet se pesë ton marihuanë e sekuestruar në Serbi është nxjerrë jashtë vendit, kryeministri Hristijan Mickoski tha dje se nuk ka informacion që marihuana e sekuestruar në Serbi ka dalë nga Maqedonia, dhe, siç tha ai, as Ministria e Brendshme nuk ka informacion të tillë.
Kryeministri e tha këtë në përgjigje të pyetjes së një gazetari:
“Nga erdhi informacioni që pesë ton marihuanë kanë dalë nga vendi, si e dini ju që kanë origjinën nga këtu? Duhet të vini dhe të jepni një deklaratë sepse unë nuk e di, dhe nuk mendoj se e di as Ministria e Brendshme. Ju i besoni qeverisë së fqinjit shumë më tepër sesa qeverisë sonë”.
Ministria e Brendshme më 7 shkurt, informoi se është duke u zhvilluar një aksion në shkallë të gjerë, në kuadër të të cilit është sekuestruar një sasi e madhe marihuane. Rreth nëntë ton marihuanë dhe mbi 1,300 shishe vaj kanabisi të prodhuar (gjysmëprodukt) u gjetën dhe u sekuestruan nga një person juridik në Shkup. Mbi 31 ton marihuanë dhe biomasë u sekuestruan nga persona juridikë në rajonin lindor.