Zjarri në Koçan: Pika poliuretani, që zhvillon temperaturë të lartë në kontakt me zjarrin, u gjetën në xhaketën e këngëtarit Andrej nga “DNK”

By N. D. On 06/05/2026 16:38

Zjarri në Koçan, foto nga Ivan Stoilkovic në Facebook

Me prezantimin e një albumi me 92 fotografi nga inspektimi i vendit të ngjarjes pas zjarrit katastrofik në diskotekën “Puls” në Koçan, i kryer më 16 mars të vitit të kaluar dhe në ditët pasuese, prokurori i lartë Darko Jakimovski nisi të vërtetonte dëshmitë e dëshmitarëve të dëgjuar deri tani në procesin e madh gjyqësor kundër 35 të akuzuarve. Fotografitë tregojnë shkatërrim dhe hi, transmeton Portalb.mk.

Atlete kudo, një derë e ngushtë hyrje-dalje si e vetmja rrugë evakuimi, një tjetër derë e pasme e mbyllur me dry në vend që të shërbente për evakuim gjatë panikut në zjarr, gjurmë se ajo është hapur me forcë nga zjarrfikësit nga jashtë dhe, fatkeqësisht, me vonesë. Po ashtu, janë evidentuar hidrante bosh, korridore të ngushta të një ish-hapësire prodhuese që pronari Dejan Jovanov e kishte shndërruar në diskotekë, dritare të mbyllura me gips dhe një banjo me dritare të vogla me rrjeta metalike.

“Mbi skenë u vu re se kishte struktura metalike dhe konzola të vendosura në një lartësi të matur nga skena deri në tavan prej 2.7 metrash, që tregon një distancë të vogël midis skenës dhe elementëve të sipërm”, u theksua nga përfaqësuesi i prokurorisë.

Sipas gjurmëve të materialeve të djegshme dhe jo të djegshme, temperatura gjatë zjarrit ka arritur rreth 800 gradë Celsius. Materialet, duke filluar nga sfungjeri poliuretanik për izolim zanor në diskotekën e improvizuar, kanë ndikuar në përhapjen e shpejtë të zjarrit dhe helmimin e të pranishmëve, të rinj dhe fëmijë, në një hapësirë të mbipopulluar. Çatia ishte e mbuluar me pllaka azbesti.

Në xhaketën e Andrej Gjorgjievskit, këngëtar i grupit “DNK”, janë gjetur pika materiali polimer – poliuretan. Ky material përdoret si ngjitës dhe izolues dhe në kontakt me zjarrin zhvillon temperatura shumë të larta, duke liruar gjithashtu cianid dhe substanca të tjera helmuese. Diskoteka ishte e veshur nga brenda me këtë material.

Të mbijetuarit dëshmuan se janë djegur nga pika që pikonin nga tavani mbi ta.

Në vijim priten publikime të videove me përmbajtje shqetësuese nga vendi i ngjarjes, ku shihen viktima, përfshirë edhe fëmijë.

Prezantimi i kësaj prove materiale vjen pas një hyrjeje të tensionuar në seancën e sotme dëgjimore, në të cilën avokatët mbrojtës sfiduan hapur mendimin e ekspertit të Institutit të Mjekësisë Ligjore. Para fillimit të procedurës së provave të Prokurorisë, mbrojtja argumentoi se disa nga provat e propozuara ishin kompromentuese dhe kërkoi përjashtimin e tyre. Kërkesat për marrjen në pyetje të ekspertëve shtesë dhe angazhimin e këshilltarëve teknikë nga mbrojtja u refuzuan nga Gjykata si të pabazuara, ndërsa Prokuroria i vlerësoi reagime të tilla si një mjet taktik për të vonuar procedurat gjyqësore.

Kujtojmë se Gjykata Themelore Penale në Shkup më 5 maj i shpalli fajtorë tre zyrtarët policorë – Kire Bogatinov, Goran Lazarov dhe Aleksandar Temelkov – në lidhje me rastin e të ashtuquajturit kabare “Puls”.

LEXO: Dënime me kusht për tre zyrtarët e policisë nga Koçani të akuzuar në lidhje me zjarrin në kabarenë “Puls”

Zjarri në “Puls” shpërtheu më 16 mars 2025 gjatë një performance të grupit DNK dhe konsiderohet një nga tragjeditë më të rënda në historinë e re të vendit. Me seancën e sotme vazhdon procedura e provave me dëgjimin e dëshmitarëve të propozuar nga Prokuroria, e cila përfaqësohet nga një ekip prej 15 prokurorësh publikë.

Për zjarrin në “Puls” janë të akuzuar 35 persona fizikë dhe tre persona juridikë. Ndër ta janë pronari i “Puls”, persona të afërt të tij, inspektorë të institucioneve shtetërore, ish-ministra dhe pjesëtarë të agjencisë që siguronte kabarenë dhe pronari i saj.

Në fillim të procesit gjyqësor, të gjithë u deklaruan se nuk ndihen fajtorë dhe kundërshtuan tezën se ekziston lidhje shkak-pasojë midis veprimeve të tyre dhe shkaktimit të zjarrit fatal.