Spiropali: Shqipëria mbështet integrimin e Maqedonisë së Veriut në BE

Ministri i Punëve të Jashtme dhe Tregtisë së Jashtme, Timço Mucunski, u takua sot me homologen e tij shqiptare, ministren e Evropës dhe Punëve të Jashtme të Republikës së Shqipërisë, Elisa Spiropali. Kjo vizitë e parë zyrtare e Spiropalit në vend, siç tha Mucunski, u kalua në diskutime rreth fqinjësisë së mirë, integrimit evropian dhe promovimit të marrëdhënieve diplomatike, transmeton Portalb.mk.

Ai tha se hapja e një Konsullate të Përgjithshme maqedonase në Korçë është paralajmëruar gjatë vitit të ardhshëm, e cila vjen pas Konsullatës tashmë të hapur të Republikës së Shqipërisë në Strugë.

Ministri Mucunski shprehu mirënjohje për bashkëpunimin në fushën e mbrojtjes së pakicës kombëtare maqedonase në Shqipëri.

“Lidhjet kulturore midis dy vendeve janë të forta. Ne vazhdojmë së bashku përmes prizmit të shumë iniciativave që mund të na bashkojnë”, tha Mucunski, duke theksuar se vizita e Spiropalit është një konfirmim i prioriteteve të përbashkëta.

Ministrja Spiropali tha se kur dy vende kanë një dëshirë të përbashkët dhe qëllime të përbashkëta, ato gjejnë kohë për vizita dhe bashkëpunim të përbashkët në të gjitha sferat, me qëllim përmirësimin e jetës së qytetarëve në të dy vendet.

“Gjeografia na ka vendosur si fqinjë, historia na ka mësuar të jemi miq dhe ekonomia e të dy vendeve na bën partnerë”, tha Spiropali.

Ajo shtoi se Shqipëria e mbështet fuqimisht Maqedoninë në rrugën e saj drejt Bashkimit Evropian dhe, siç thotë ajo, jo vetëm sepse të dy vendet janë partnerë, por sepse vendi ynë me institucione të forta është siguri për të gjithë rajonin.

“Shqipëria mbështet integrimin e Maqedonisë në Bashkimin Evropian, sepse ndajmë një të ardhme të përbashkët dhe sepse këtu jeton një popull shtetndërtues, që është 33 përqind sipas regjistrimit të fundit”, theksoi Spiropali, duke theksuar rolin e popullit shqiptar në vend.

Ajo tha se integrimi evropian është numri një në politikën e jashtme të Shqipërisë, por edhe të popullit shqiptar.

“Për ne në Shqipëri, është një arritje e madhe që kemi hapur 34 kapituj në 13 muaj. Sidomos në fushat e ligjit, luftës kundër korrupsionit dhe respektit për pakicat. Është treguar edhe një herë se rruga jonë është e duhura dhe se e ardhmja evropiane e Shqipërisë është e pandashme nga trajektorja e Ballkanit Perëndimor”, shtoi ajo.

Sipas saj, procesi i BE-së nuk është garë, por një rrugë e përbashkët drejt përkatësisë natyrore të popujve tanë.

Kur u pyet nga gazetarët nëse Shqipëria ka të dhëna të sakta për shqiptarët nga Maqedonia që kërkojnë shtetësi shqiptare, duke qenë se vendi është në prag të anëtarësimit në BE, Spiropali tha se nuk ka një numër të saktë aplikimesh dhe konfirmoi se vendi do t’i përmbahet procedurës që ka për dhënien e shtetësisë.

“Në Republikën e Shqipërisë ekziston një procedurë e caktuar për marrjen e shtetësisë dhe ne e respektojmë atë nga njëra anë pa ndikuar ose penguar ata që plotësojnë kriteret dhe dëshirojnë të bëhen qytetarë të Shqipërisë. Unë besoj se shqiptarët nga Maqedonia e Veriut kishin dëshirë për shtetësi të dyfishtë dhe kjo shihet si besnikëri ndaj vendit të tyre të Maqedonisë së Veriut, por pa hezitim edhe ndaj shtetit të Republikës së Shqipërisë”, u përgjigj Spiropali.