Shqipëria promovoi identitetin, katër pasuri jomateriale u shpallën vlerë kombëtare
Trashëgimia kulturore shqiptare pasurohet me katër elemente të reja që tashmë mbrohen dhe promovohen zyrtarisht nga shteti. Vallja e Ngjalës, Vallja Dyshe Myzeqare, dijebërja e veshjes zadrimore dhe dijebërja e qeleshes janë shpallur “Vlerë Kombëtare e Trashëgimisë Kulturore Jomateriale”, duke u përfshirë në fondin e pasurive që konsiderohen pjesë e identitetit shpirtëror dhe kulturor të vendit, shkruan Portalb.mk.
Lajmin e ka bërë të ditur ministri i Turizmit, Kulturës dhe Sportit të Shqipërisë Blendi Gonxhja, në faqen e tij zyrtare në Facebook duke theksuar se këto elemente janë pjesë e rëndësishme e trashëgimisë sonë shpirtërore dhe tashmë përfshihen në fondin e pasurive që mbrohen dhe promovohen nga shteti shqiptar.
Vendimi u mor nga Këshilli Kombëtar i Trashëgimisë Kulturore Jomateriale, në mbledhjen e tij të radhës, ku u vlerësuan praktika dhe tradita që mbajnë gjallë identitetin kulturor të komuniteteve në zona të ndryshme të vendit.
Elementët e shpallur “Vlerë Kombëtare e Trashëgimisë Kulturore Jomateriale” janë konkretisht:
- Dijebërja dhe format e përdorimit të veshjes tradicionale të gruas dhe vajzës zadrimore.
- Vallja e Ngjalës.
- Vallja Dyshe Myzeqare.
- Dijebërja e qeleshes (plisi, kësula, kapuçi, qylahi, kapica, takija, qylafi).
- Tradita e thurjes me gjilpërë me oje/ojna/ojma/cimb.
Sipas ministrit Gonxhja, këto pasuri nuk janë vetëm shprehje arti dhe mjeshtërie, por edhe rrënjë të historisë sonë, kujtesë kolektive dhe identitet që bashkon shqiptarët.
Gonxhja ka deklaruar se Ministria e Turizmit, Kulturës dhe Sportit do të vijojë punën për evidentimin, mbrojtjen dhe promovimin e elementëve të tjerë të trashëgimisë kulturore jomateriale, duke i konsideruar ato si një pasuri të çmuar kombëtare dhe një potencial të rëndësishëm për zhvillimin kulturor dhe turistik të vendit.