QMK: Zjarre aktive ka në Likovë dhe Studeniçan, nën kontroll janë në Berovë dhe “Vardarishte”
Dy zjarre aktive dhe po aq janë nën kontroll këtë mëngjes në territorin e vendit, njofton Qendra për Menaxhim me Kriza (QMK), transmeton Portalb.mk.
Zjarret janë aktive në fshatin Nikushtak, në Komunën e Likovës, ku digjen pyje të degraduara me rritje të ulët dhe pyll dushku, dhe ai pranë fshatrave Varvara dhe Draçevicë në Komunën e Studeniçanit, ku digjet pyll i përzier dhe bimësi e ulët.
QMK thotë se zjarret në Kodrën e Drxhinit, në fshatin Rusinovë, Komuna e Berovës, ku digjen pyje dushku dhe ahu, si dhe fier, si dhe ai në deponinë Vardarishte në Komunën e Gazi Babës, janë nën kontroll.
Në 24 orët e fundit, siç thotë QMK, ka pasur 33 zjarre në hapësirë të hapur, nga të cilat 29 janë shuar.
Në shumicën e zjarreve të shuar, të cilat ishin në disa komuna, digjej bimësi e ulët dhe mbeturina.
Më 2 shtator Ministria e Bujqësisë e zgjati deri më 30 shtator ndalimin e lëvizjes në pyjet dhe tokën pyjore të Maqedonisë së Veriut. Ministria përkujtoi se qytetarët që do të kapen duke lëvizur në këto hapësira do të dënohen nga 1 500 deri 2000 euro, në bazë të nenit 106 nga Ligji për Pyjet.
Në vitin 2024, 126 zjarre pyjore dogjën mbi 94.000 hektarë në Maqedoni, që është pothuajse aq sa dhjetë vitet e mëparshme së bashku, sipas të dhënave nga Sistemi Evropian i Informacionit për Zjarret në Pyje (EFFIS).