Qeveria ka propozuar Nenad Saveskin për kryeprokuror, pritet votimi në Kuvend

By N. D. On 10/03/2026 14:15

Nenad Saveski. Foto nga profili i tij në Facebook

Gjyqtari i Gjykatës Penale Nenad Saveski është propozimi i Qeverisë për prokuror publik të shtetit, i cili, nëse i jepet dritë jeshile nga Parlamenti, do të duhet të zëvendësojë prokurorin, Ljupço Kocevski. Në seancën e sotme, Qeveria zgjodhi Saveskin nga katër kandidatë, për të cilët Këshilli i Prokurorëve Publikë paraprakisht dha mendim pozitiv, së bashku me Anita Topolova-Isajlovska, Lençe Ristoska dhe Lidija Raiçeviq, transmeton Portalb.mk.

Nenad Saveski është i diplomuar në drejtësi, i cili e filloi karrierën e tij si prokuror në vitin 2009 dhe u zgjodh gjyqtar në vitin 2016. Deri më tani, ka gjykuar raste të krimit të organizuar dhe korrupsionit në departamentin e specializuar të Gjykatës Penale në Shkup.

Procedura e përzgjedhjes filloi me shpalljen e bërë nga Parlamenti më 12 janar, me afat prej 15 ditësh për aplikimin e kandidatëve, të publikuar në “Gazetën Zyrtare”. Kandidatët duhej të kishin të paktën 10 vjet përvojë të vazhdueshme si prokurorë publikë ose gjyqtarë në fushën e së drejtës penale.

Kujtojmë se, Këshilli i Prokurorëve, në mbledhjen e 17 shkurtit 2026 shqyrtoi kandidaturat e pesë kandidatëve për pozicionin më të lartë të prokurorit publik – prokuror publik shtetëror. Katër kandidatë për prokuror publik republikan, prokurorja në detyrë Anita Topolova Isajlovska, prokurorët Lidija Raiçeviq dhe Lençe Ristoska, dhe gjyqtari Nenad Saveski, morën mendim pozitiv nga Këshilli i Prokurorëve Publikë. Ndërkaq, për kandidatin Vlladimir Pançevski, dikur i dënuar për keqpërdorim të sistemit AKMIS, Këshilli i Prokurorëve konkludoi se nuk i plotëson kushtet ligjore, sepse nuk ka përvojë pune të pandërprerë prej të paktën 10 vitesh, që është parakusht për t’u vlerësuar si kandidat për pozicionin e Ljupço Kocevskit të shkarkuar. Me këtë, këshilli ia kaloi topin Qeverisë për prokuror të ri publik republikan.

Mirëpo, pavarësisht se Lençe Ristoska është në garë, kryeministri Hristijan Mickoski në TV Kanal 5 tha se prokurorja Lençe Ristoska nuk është kandidate që Qeveria po e shqyrton për pozicionin e prokurorit publik të shtetit. Ai shtoi se pozicioni përfundimtar do të shpallet pasi Qeveria të shqyrtojë dokumentet zyrtare. Pas deklaratës së kryeministrit, Platforma e organizatave civile për luftën kundër korrupsionit dhe Ristoska dolën me reagime.

Zgjedhja e kryeprokurorit të ri vjen pasi, më 29 korrik, Parlamenti votoi për interpelancë në lidhje me punën e Ljupço Kocevskit, dhe ai deklaroi se nuk do të jepte dorëheqjen nga posti i tij, por do t’i përkushtohej edhe më shumë punës së tij. Pas tragjedisë në Koçani, kryeministri Hristijan Mickoski kishte njoftuar për pezullimin e procedurës për shkarkimin e Kocevskit, duke pasur parasysh hetimin e gjerë që po zhvillohet në lidhje me rastin.

Por, më 16 dhjetor 2025, Kuvendi i Maqedonisë vendosi ndërprerjen e funksionit të Prokurorit Publik të Maqedonisë për Ljupço Kocevskin. Ai paraqiti dorëheqje të parevokueshme në ditën kur Kuvendi do të shqyrtonte propozimin e Qeverisë për shkarkimin e tij. Deri në zgjedhjen e prokurorit të ri shtetëror, pozicionin e mban prokurorja Anita Topolova Isajlovska, e cila u zgjodh më 22 dhjetor nga Këshilli i Prokurorëve Publikë.