Projektligji për mbrojtje nga duhani në RMV është vendosur për debat publik
Ministria e Shëndetësisë njofton se projektligji për mbrojtje nga duhani është publikuar në Regjistrin Elektronik Kombëtar të Rregulloreve (REKRR), ku të gjithë qytetarët dhe organizatat e interesuara mund të marrin pjesë në debatin publik para miratimit të tij, transmeton Portalb.mk.
“Me këtë ligj hapim një çështje thelbësore që prek drejtpërdrejt shëndetin dhe të ardhmen e fëmijëve dhe të rinjve tanë. Faktet janë të qarta dhe të pakontestueshme – duhani dhe nikotina mbeten shkaku kryesor i vdekjeve të parakohshme, ekspozimi ndaj tymit dhe aerosoleve dëmton edhe ata që nuk kanë zgjedhur të pijnë duhan, ndërsa produktet e reja të nikotinës, aromat, marketingu agresiv dhe promovimi digjital janë të drejtuara pikërisht ndaj të rinjve. Prandaj, Ministria e Shëndetësisë ka përgatitur një Ligj të ri për mbrojtje nga duhani, qëllimi i të cilit nuk është ndëshkimi, por parandalimi, shëndeti publik dhe mbrojtja e kategorive më të cenueshme të qytetarëve”, vlerëson ministri i Shëndetësisë, Azir Aliu.
Qëllimi i ndryshimeve të reja ligjore është vendosja e kontrollit mbi paraqitjen dhe përhapjen e produkteve të reja të duhanit dhe nikotinës, veçanërisht mbi promovimin e tyre agresiv dhe qasjen e lehtë. Njëkohësisht, parashihet ndalim i plotë i reklamimit, promovimit dhe sponsorizimit, kufizim i shitjes dhe ekspozimit të produkteve të duhanit dhe nikotinës, si masa parandaluese për mbështetjen e lënies së varësisë, si dhe forcimi i ndalimit të pirjes së duhanit në hapësirat publike dhe të punës.
“Me këtë ligj dërgojmë një mesazh të qartë se shëndeti është vlerë më e lartë se çdo interes komercial, se shëndeti i fëmijëve nuk mund të jetë objekt përfitimi dhe se hapësira publike duhet të jetë një hapësirë e sigurt”, thuhet në njoftimin e Ministrisë së Shëndetësisë.
Gjithashtu, thuhet më tej, zgjidhja ligjore është e harmonizuar me rregullativën evropiane dhe me detyrimet ndërkombëtare që shteti ka marrë përsipër, përfshirë parimet e Konventës Kornizë të Organizatës Botërore të Shëndetësisë.
Linkun e Projekt-ligjit për mbrojtje nga duhanpirja mund ta gjeni KËTU.
Përndryshe, sipas një studimi të Institutit të Shëndetit Publik, Maqedonia humbet rreth 4,000 jetë çdo vit si pasojë e pirjes së duhanit ose produkteve të duhanit. Numri i duhanpirësve aktivë në vend është 40.4 përqind, dhe vetëm pesë përqind e duhanpirësve kanë arritur ta lënë duhanin vitet e fundit.
Gjithashtu sipas analizave të “Analytica Think Tank”, një institucion i pavarur për kërkimin e politikave publike, të rinjtë në Maqedoni fillojnë të pinë duhan në moshën 13 vjeç, ndërsa 40 përqind e popullsisë nën moshën 18 vjeç janë duhanpirës.