Petrovska: Do të sigurohemi që trajtimi i ushtarëve ukrainas të mos ndikojë në proceset e rregullta në shëndetin publik
Deri më tani, asnjë kërkesë specifike nuk është marrë për kujdesin dhe trajtimin e ushtarëve ukrainas në vend. Ne do të jemi të kujdesshëm që përgjigja, veprimi, mbështetja dhe ndihma që ofrojmë të mos ndikojnë në proceset e rregullta në shëndetin publik. Kështu tha sot ministrja e mbrojtjes nga Shtipi, Slavjanka Petrovska, me rastin e 75 vjetorit të NATO-s dhe katër viteve të anëtarësimit tonë në Aleancë, duke iu përgjigjur pyetjeve të gazetarëve nëse ushtria maqedonase është e gatshme të pranojë trajtimin e ushtarëve ukrainas, transmeton Portalb.mk.
“Ne si Ministri e Mbrojtjes jemi absolutisht të gatshëm t’i përgjigjemi trajtimit të ushtarëve ukrainas, por duhet pasur parasysh se trajtimi është në kompetencë të Ministrisë së Shëndetësisë. Ne patëm një bisedë fillestare me ministrin e shëndetësisë, ndërsa tani po shkojmë edhe më tutje në intensifikimin e negociatave, për të përcaktuar kapacitetet e sakta dhe sigurisht mënyrën e duhur, nëse më në fund lind nevoja për këtë”, tha ministrja Petrovska.
Sipas saj, edhe pse jetojmë në kohë paqeje, Armata e ka obligim që vazhdimisht dhe në vazhdimësi të ruajë gatishmërinë luftarake, qoftë brenda kazermave, qoftë përmes misioneve të Krivolakut.
Përndryshe, mundësia e krijimit të një qendre rehabilitimi për ushtarët e plagosur ukrainas dhe fëmijët ukrainas me ndihmën e shteteve të Ballkanit ishte tema e bisedës mes Presidentit Stevo Pendarovski dhe Presidentit ukrainas Volodymyr Zelensky në takimin e përbashkët në Tiranë në fund të muajit të kaluar në kuadër të samitit Ukrainë-Evropa Juglindore.
Zelensky publikoi një video në rrjetin social X të takimit me Pendarovski, në të cilën u prezantuan pjesë të shkurtra të bisedës së tyre, në të cilën dy presidentët po diskutojnë mundësinë e krijimit të një qendre rehabilitimi për ushtarët e plagosur ukrainas dhe fëmijët ukrainas me ndihmën e shteteve ballkanike.
Në fillim të muajit nga kabineti i presidentit Pendarovski u tha se kjo ide është parimisht e pranueshme për ne si shtet, por, siç kanë thënë nga aty, nevojitet një elaborim konkret i detajeve, për të cilat do të jenë qeveritë e vendeve që do të marrin pjesë në program.
Zyra e presidentit tregoi në atë kohë se ishte një propozim fillestar i kryeministrit të Kroacisë dhe presidentit të Malit të Zi, duke pasur parasysh se këto dy vende tashmë kanë përvojë dhe kapacitete për rehabilitim nga aksionet ushtarake të viteve 1990.
Petrovska një javë më parë tha se nuk e përjashton mundësinë e vënies në dispozicion të objekteve në dispozicion të shtetit për trajtimin e ushtarëve të plagosur nga Ukraina.