Pehçeva njëzëri i tha “jo” ndërtimit të një qendre të të dhënave, Mickoski: Inteligjenca artificiale është nafta e re që mund t’i sjell zhvillim RMV-së
Këshilli i Komunës së Peçevës në seancën e sotme të 11-të, njëzëri e hodhi poshtë iniciativën e paraqitur nga një investitor privat për fillimin e procedurës për hartimin e dokumentacionit urbanistik-planor për ndërtimin e një qendre të të dhënave, në parcela kadastrale në KK Pançarevë, transmeton Portalb.mk.
Kryetari i Peçevës, Aleksandar Kitanski, theksoi se nuk dëshiron të spekulohet me efektet e mundshme pozitive apo negative të një qendre të të dhënave pa analiza profesionale dhe elaborate. Ai theksoi se janë duke u konsultuar ekspertë për përfitimet e mundshme, por edhe për ndikimet potenciale nga një investim i këtij lloji.
Në diskutim u hapën edhe çështjet e konsumit të ujit dhe energjisë elektrike, duke marrë parasysh gjendjen e infrastrukturës në Pançarevë, ndërsa kryetari Kitanski u përgjigj se aktualisht Komuna e Peçevës nuk ka një studim profesional mbi bazën e të cilit do të mund të përcaktohej konsumi i saktë apo ndikimi i një qendre të mundshme të të dhënave.
Nga ana tjetër, kryeministri Hristijan Mickoski, tha se inteligjenca artificiale dhe qendrat e të dhënave janë nafta e re në botë dhe Maqedonia nuk duhet ta humbasë këtë moment historik, i cili mund t’i mundësojë rritje ekonomike afatgjatë.
Ai, njëkohësisht, drejtoi kritika të ashpra ndaj strukturave të caktuara në shoqëri, të cilat, sipas tij, me vetëdije po e pengojnë zhvillimin e vendit.
Kryeministri Mickoski theksoi se të gjitha projektet duhet të realizohen duke respektuar plotësisht rregulloret ligjore dhe duke mbrojtur mjedisin, por nënvizoi se kundërshtarët e këtyre investimeve veprojnë me motive të dyshimta.
“Personalisht mendoj se struktura të caktuara në shoqëri kanë një qëllim tjetër, dhe më së paku është mbrojtja e interesave të qytetarëve. Të njëjtët që ishin më të zëshmit kundër investimeve në antimon dhe ar, tani janë kundër edhe qendrave të të dhënave. Në thelb, ata janë kundër zhvillimit të Maqedonisë. Kur e gjithë bota po vrapon drejt inteligjencës artificiale, ne kemi njerëz të cilët, për një donacion ose grant nga burime të dyshimta, përpiqen të na turbullojnë mendjen me deklarata jologjike. Zhvillimi i njerëzimit është një proces i pakthyeshëm dhe unë absolutisht qëndroj pas qëndrimit se qendrat e të dhënave duhet të ndërtohen”, deklaroi Mickoski në përgjigje të pyetjes së një gazetari pas inspektimit të investimeve të realizuara dhe modernizimit të Drejtorisë për Punë Hidrometeorologjike (DPHM).
DOM ndërkohë e përshëndet vendimin e Këshillit të Komunës së Pehçevës.
“Ky është një hap i rëndësishëm, por këtu nuk përfundon historia. Ne do të vazhdojmë t’i ndjekim me vëmendje të gjitha procedurat për ndërtimin e qendrave të të dhënave, si dhe do të reagojmë gjithmonë kur të ketë përpjekje që projekte të tilla të shtyhen përpara pa informacion të mjaftueshëm, pa u informuar publiku në kohë dhe pa analiza të qarta për ndikimin mbi konsumin e ujit dhe energjisë elektrike. Përfitimet dhe pasojat e mundshme të dëmshme nga projekte të tilla duhet të publikohen në kohë dhe në mënyrë transparente, me përfshirjen e plotë të të gjitha palëve të prekura”, thonë nga DOM.
Ata shtojnë se kjo nuk është vetëm çështje për Pehçevën. Të njëjtat rregulla duhet të vlejnë në të gjithë territorin e Maqedonisë.
“Maqedonisë i nevojitet zhvillim digjital, por jo me çmimin e mjedisit dhe interesit publik. DOM do të vazhdojë të ndjekë dhe të reagojë, sepse për çdo qendër të të dhënave, në çdo komunë – vendimet duhet të merren plotësisht në mënyrë transparente, të përgjegjshme dhe me pjesëmarrjen e qytetarëve”, thuhet në reagim.