Nikollovski për fondet IPARD: 130 milionë euro të bllokuara, 3.000 biznese dhe 10.000 vende pune në rrezik

By N. D. On 13/11/2025 15:54

Lupço Nikollovski. Foto: Pritnscreen nga video-live i MIA-s

Ljupço Nikollovski, deputeti i LSDM-së dhe ish-ministër i Bujqësisë, reagoi ndaj intervistës së ministrit Cvetan Tripunovski, i cili, megjithëse pranoi se programi IPARD ishte pezulluar, nuk mori përgjegjësi dhe as nuk ofroi zgjidhje, transmeton Portalb.mk.

“Tripunovski, dukshëm nervoz, doli në televizion dhe në vend që të ofronte zgjidhje, ai vetë konfirmoi se IPARD ishte pezulluar – pa thënë se sa dëme ishin shkaktuar, pa thënë se sa kohë do të zgjaste hetimi për korrupsionin dhe krimin e bashkëpunëtorëve të tij më të ngushtë, njëri prej të cilëve ishte këshilltarja e tij speciale,” tha Nikollovski.

Nikollovski tha se 130 milionë euro para evropiane ishin në rrezik, të cilat supozohej të sillnin mbi 3,000 biznese të reja dhe 10,000 vende të reja pune. Siç tha ai, këto janë para – grante për fermerët e rinj, për familjet që investuan fondet e tyre dhe që sot janë tradhtuar.

“Në vend që të merrte përgjegjësi, ministri sulmoi programet e mëparshme që sollën rezultate të vërteta, ai sulmoi mbi 4,000 prodhues të vegjël të rinj, familje të reja që sot jetojnë me punën e tyre. Programet që ishin simbol i suksesit tani janë cak i kritikave të pakuptimta”, tha Nikollovski.

Kujtojmë se, më 6 nëntor, në RMV janë arrestuar pesë persona nën dyshimet për ryshfet dhe ndikim të paligjshëm. I dyshuari kryesor dyshohet se ka premtuar para drejtorit të Agjencisë për Mbështetje Financiare në Bujqësi që të nënshkruhej një marrëveshje për fonde IPARD, ndonëse kompania e tij nuk plotësonte kushtet. Tre ndërmjetës, përfshirë zyrtarë shtetërorë, dyshohet se kanë ndikuar në marrjen e vendimit të paligjshëm, ndërsa gjatë bastisjeve u sekuestruan para të konsiderueshme.

Ilija Stoilev, aktualisht Drejtor i Agjencisë për Mbështetje Financiare në Bujqësi dhe Zhvillim Rural, është privuar nga liria pasditen e 6 nëntorit.