Nesër në Shkup do të hapet projekti franko-gjerman “Çarshia e vjetër e Shkupit: Vizion për të ardhmen”

Instituti Francez në Shkup dhe Ambasada e Francës, së bashku me Institutin Goethe dhe Ambasadën e Republikës Federale të Gjermanisë, do të hapin projektin franko-gjerman “Çarshia e vjetër e Shkupit: Vizion për të ardhmen”, i cili do të mbahet të martën, më 30 shtator 2025, në orën 10:00, në ambientet e Europe House – Shkup, transmeton Portalb.mk.

Eventi do të hapet nga Christophe Le Rigolaire, ambasador i Francës, dhe Petra Drexler, ambasadore e Gjermanisë.

Në hapje do të flasin edhe Katharina Ostwald-Richter, drejtoreshë e Institutit Goethe, dhe Grégoire Gisler, drejtor i Institutit Francez në Shkup.

Në hapje të këtij projekti, bazuar në dialogun ndërkulturor dhe ndërgjeneracional, do të prezantohet projekti, i cili synon të stimulojë kreativitetin tek të rinjtë, të promovojë trashëgiminë historike të Çarshisë së Shkupit dhe të propozojë zgjidhje krijuese për ruajtjen e trashëgimisë kulturore në të ardhmen.

Pikërisht në hapje, që është edhe dita e parë e punës, që do të marrin pjesë animatorët dhe pjesëmarrësit e çdo punëtorie, dhe secili mentor do të prezantojë aktivitetet që do të pasojnë në ditët në vijim. Janë planifikuar gjithashtu punëtori video, punëtori fotografike, punëtori historie, punëtori letërsie dhe punëtori arkitekturore, dhe do të marrin pjesë studentë nga fakultete të ndryshme në Shkup.

Animatorët e punëtorive janë artistë, regjisorë dhe profesorë të njohur, përfshirë: Léonore Mercier (Francë), regjisore dhe animatore e punëtorisë video, shkrimtarja Ariane Jouse (Francë), e cila do të drejtojë punëtorinë letrare, fotografi Heinrich Holtgreve (Gjermani), animator i punëtorisë fotografike, si dhe Daniela Nikolova, historiane, këshilltare dhe kuratore, mentore e punëtorisë historike, dhe Prof. Dr. Divna Pençiq, profesoreshë në Fakultetin e Arkitekturës në Shkup dhe animatore e punëtorisë arkitekturore.

Projekti mbyllet të shtunën, më 4 tetor 2025, në orën 20:00 në Suli Han, si pjesë e programit të Natës së bardhë, në formën e një spektakli multimedial dhe prezantimit të rezultateve nga pjesëmarrësit.

Pas prezantimeve, në orën 21:30, do të ketë koncert të muzikës elektronike PARIS-BERLIN-SHKUP. Setet e DJ-ve do të sigurohen nga DJ Darko Jordanov (Shkup), DJ Bojan Janev (Shkup/Berlin) dhe DJ Geneva (Paris), si shenjë e mbylljes së projektit.

Këto dy ngjarje, pjesë e Natës së bardhë të Shkupit, janë të hapura për të gjithë vizitorët.