Në Prishtinë do të hapet ekspozita “Persekutimi komunist i hartuesve të alfabetit shqip dhe familjarëve”

Instituti Albanologjik i Prishtinës, të hënën më (3 mars) me fillim nga ora 11:30, në hollin e Institutit Albanologjik, do të hapë ekspozitën “Persekutimi komunist i hartuesve të alfabetit shqip dhe familjarëve”, e organizuar nga Instituti i Studimeve për Krimet dhe Pasojat e Komunizmit në Tiranë në bashkëpunim me Institutin Albanologjik-Prishtinë, transmeton Portalb.mk.

Nga faqja zyrtare e Institutit Albanologjik bëjnë të ditur se gjatë ekspozitës do të prezantohen fakte të panjohura më parë mbi persekutimin komunist të hartuesve të alfabetit shqip dhe familjeve të tyre. Do të shfaqen fotografi dhe dokumente të pazbuluara më parë mbi këtë tematikë.

Kjo ekspozitë është prezantuar më parë në disa vende brenda Shqipërisë, si dhe në Manastir me rastin e përvjetorit të Kongresit të Manastirit. Po ashtu, më 28-30 janar, 2025, është shfaqur në Institutin e Trashëgimisë Shpirtërore dhe Kulturore të Shqiptarëve në Shkup, nën kujdesin e Ambasadës Shqiptare në Maqedoninë e Veriut.

Me këtë rast, do të bëhet edhe nënshkrimi i memorandumit të bashkëpunimit ndërmjet Institutit Albanologjik-Prishtinë dhe Institutit të Studimeve për Krimet dhe Pasojat e Komunizmit në Tiranë.