Në maj u matën temperaturat më të ulëta në 70 vitet e fundit
Temperaturat minimale të ajrit në fillim të muajit maj ishin ndër më të ulëtat e regjistruara në vend gjatë 70 viteve të fundit, transmeton Portalb.mk.
Sipas të dhënave të Drejtorisë për Çështje Hidrometeorologjike, temperatura minimale absolute për muajin maj u tejkalua në stacionet meteorologjike në Berovë, Kriva Pallankë, Shtip, Demir Kapi dhe Ohër.
Temperatura më e ulët e muajit u regjistrua në Berovë më 4 maj dhe ishte minus 4.6 gradë Celsius.
Në nivel global, sipas Shërbimit të Ndryshimeve Klimatike Copernicus të Bashkimit Evropian, maji i kaluar ishte maji i dytë më i nxehtë në histori, pasi ndryshimet klimatike kontribuuan në rritjen e temperaturave mesatare në tokë dhe në dete.
Sipas të dhënave të tyre, maji më i nxehtë deri më tani është regjistruar në vitin 2024, në statistika që datojnë që nga viti 1940.
Temperatura mesatare globale muajin e kaluar ishte 1.42 gradë Celsius mbi mesataren e periudhës paraindustriale të shekullit XIX.
Megjithatë, renditja për Evropën tregon se ky ishte vetëm maji i shtatë më i nxehtë për kontinentin, ndërsa analizat për Maqedoninë e Veriut tregojnë rezultate të ngjashme sa i përket ndikimit të ndryshimeve klimatike.
“Muaji maj në Maqedoni u karakterizua nga luhatje të theksuara të temperaturave, nga ditë më të ftohta dhe me shi në fillim të muajit, deri te mot i ngrohtë dhe me diell në fund të tij. Ky kombinim është tipik për muajt pranverorë, por këtë vit ishte më i theksuar për shkak të faktorëve klimatikë, paqëndrueshmërisë rajonale dhe kushteve lokale, të cilat bënë që ky maj të mbetet nën mesataren shumëvjeçare klimatike”, thonë nga Drejtoria për Çështje Hidrometeorologjike.
Temperaturat minimale të regjistruara nga stacionet automatike meteorologjike të rrjetit kombëtar të Drejtorisë së Çështjeve Hidrometeorologjike, në periudhën nga 1 deri më 4 maj, në shumicën e stacioneve kryesore tejkaluan rekordet historike të temperaturave minimale absolute për muajin maj në periudhën 1950–2026. Shkaku kryesor ishte depërtimi i masave të ftohta ajrore nga veriu.
Në dekadën e dytë të muajit temperaturat dhe reshjet ishin afër mesatares, ndërsa në fund të muajit filloi një rritje graduale e temperaturave. Megjithatë, kjo nuk ishte e mjaftueshme për të arritur vlerat mesatare shumëvjeçare.
Temperatura mesatare mujore e ajrit në maj u tejkalua vetëm në Shkup, ku arriti në 17.9 gradë Celsius. Temperatura maksimale më e lartë u mat më 28 maj në Demir Kapi dhe arriti në 33.8 gradë Celsius.
Analiza e temperaturave mesatare mujore në maj gjatë dhjetë viteve të fundit për Shkupin tregon se vitet më të ngrohta krahasuar me mesataren tridhjetëvjeçare kanë qenë 2018 dhe 2022, me temperatura përkatësisht 2 dhe 1.4 gradë Celsius mbi mesataren.
Ndryshe nga ato vite, këtë vit tejkalimi i temperaturës mesatare mujore në maj ishte vetëm 0.2 gradë Celsius.
Vera pritet të jetë më e nxehtë dhe më e thatë
Sipas Drejtorisë së Çështjeve Hidrometeorologjike, vera me shumë gjasa do të jetë një tjetër verë me temperatura mbi mesataren dhe me më pak reshje krahasuar me vlerat mesatare shumëvjeçare.
Analizat tregojnë se në muajt e ardhshëm temperaturat pritet të arrijnë nivele mbi mesataren në shkallë globale, jo vetëm në pjesën juglindore të Evropës.
Në Maqedoninë e Veriut, temperaturat mund të jenë deri në 3 gradë Celsius mbi mesataren pothuajse në të gjithë territorin e vendit.
Devijimi më i madh pozitiv nga mesatarja shumëvjeçare pritet të regjistrohet në muajin korrik, ndërsa reshjet sezonale në përgjithësi do të jenë më të ulëta se mesatarja në shumicën e rajoneve të vendit.
Mesatarja shumëvjeçare për periudhën 1991–2020 tregon se temperaturat verore lëvizin nga rreth 16 gradë Celsius në zonat malore deri në 26.1 gradë Celsius në Gjevgjeli. Ndërkohë, reshjet mesatare gjatë verës janë më të larta në pjesën lindore të vendit, ku arrijnë rreth 170 milimetra.
Në Shkup, temperaturat mesatare për qershorin, korrikun dhe gushtin lëvizin nga 22.2 deri në 24.7 gradë Celsius, ndërsa reshjet mesatare variojnë nga 34 deri në 47 milimetra.