Ndryshimet klimatike, zjarret dhe thatësira në Evropë shkaktuan dëme prej qindra miliardë eurosh

Vapа rekordе dhe thatësirat e kësaj vere në Evropë, për të cilat shkencëtarët thonë se janë përkeqësuar nga ngrohja globale, kanë shkaktuar çrregullime në prodhimin e energjisë, transport dhe sistemet e shëndetit publik në kontinent, ndërsa sezoni i zjarreve në pyje është në rrugë të bëhet më i madhi i regjistruar ndonjëherë, transmeton Portalb.mk.

Për secilin në Evropë që ende mendonte se ndryshimet klimatike ishin problem i brezave të ardhshëm, valët përvëluese të të nxehtit të kësaj vere e kanë bërë të qartë se ndikimet e tyre ekonomike, të kushtueshme dhe që ndryshojnë jetën, tashmë kanë mbërritur.

Goditja ndaj ekonomisë së rajonit tashmë mund të matet me qindra miliardë euro, vlerësojnë ekonomistët dhe akademikët. Megjithatë, ata paralajmërojnë se kjo është vetëm fillimi, pasi kostot do të rriten më shpejt se temperaturat.

Klima po ndryshon më shpejt në Evropë se në çdo kontinent tjetër, ndërsa dëmet tashmë po rëndojnë financat publike, duke shkaktuar luhatje të mëdha të inflacionit, duke ndryshuar hartën turistike dhe duke detyruar bllokun evropian të rishqyrtojë mënyrën se si prodhohet energjia dhe transportohen mallrat.

Temperaturat arritën rekorde në qershor dhe korrik, ndërsa dëmet ekonomike ka të ngjarë të tejkalojnë të gjitha nivelet e mëparshme, thonë ekonomistët.

Lundrimi në lumenjtë Rajnë dhe Danub, arterie kryesore për transportin e mallrave, është kufizuar ndjeshëm për shkak të niveleve të ulëta të ujit. Më shumë se gjashtë reaktorë bërthamorë kanë ndalur ose kanë ulur prodhimin për shkak të vështirësive në ftohje.

Parashikimet për prodhimet bujqësore janë ulur, ndërsa kulturat që korren vonë, si misri dhe luledielli, kanë pësuar humbje prej 6 deri në 7 për qind që në korrik.

Nxehtësia ul produktivitetin njerëzor dhe tashmë ka marrë dhjetëra mijëra jetë. Vetëm Gjermania ka raportuar më shumë se 10 mijë vdekje të lidhura me temperaturat e larta.

Ndërkohë, kostot e reagimit emergjent, si shuarja e zjarreve apo masat për uljen e konsumit të energjisë, po rëndojnë më tej buxhetet publike.

Duke pasur parasysh se eurozona pritet të rritet me vetëm 1 përqind këtë vit, goditja ekonomike konsiderohet e konsiderueshme.