LSDM: Prokuroria të mos hesht, por të hapë lëndë për tenderin kriminal prej 1.2 milion eurosh në Postë
Prokuroria Publike nuk duhet të heshtë për tenderët kriminalë, por të veprojë, thonë nga LSDM duke shtuar se ajo duhet të hapë menjëherë lëndë dhe të fillojë hetim për tenderin skandaloz prej 1.2 milion eurosh në SHA Posta, të dhënë një kompanie të një këshilltari të ZNAM, transmeton Portalb.mk.
“Ekipi Kundër Korrupsionit ka publikuar akuza dhe prova specifike nga një denoncues, një punonjës i Postës, në lidhje me pompimin e organizuar të parave publike dhe vjedhjen sistematike të parave nga qytetarët. Ka dyshime të bazuara se mbi 300,000 euro në vit, para të qytetarëve, po nxirren përmes skemave të korrupsionit Si? Sipas akuzave, rreth 14 higjienistë mungojnë vazhdimisht dhe të tjerë punojnë me kohë të pjesshme, pavarësisht faktit se të gjithë paguhen me shumë të plotë, sikur të ishin të punësuar dhe të pranishëm gjatë gjithë ditës”, shtojnë nga LSDM.
Ata theksojnë se kjo mbulohet duke nënshkruar ditarë të rremë për higjienistë që mungojnë, raporte të rreme për pastrime të supozuara të përgjithshme që nuk ndodhin kurrë.
“Nëse institucionet nuk veprojnë, kjo do të thotë se ato janë mbrojtëse të krimit të VMRO-së dhe ZNAM-it. Ne kërkojmë që Prokuroria Publike të hapë lëndë dhe të fillojë urgjentisht hetim. Kushdo që shkeli ligjin duhet të mbajë përgjegjësi. Puna nuk ka mbaruar”, thuhet në reagim.
Kujtojmë se kjo është “bomba” e radhës në një seri konferencash për shtyp në të cilat, siç njoftoi kreu i LSDM-së, ekipi anti-korrupsion i LSDM-së do të zbulojë skemat kriminale të partisë në pushtet.
“Bomba” e parë kishte të bënte me abuzimet me fondet IPARD, ndërsa tjetra kishte të bënte me një kompani që mori mbi 160 tendera nga shteti, të cilën socialdemokratët e lidhën me drejtorin aktual të Shërbimit të Çështjeve të Përgjithshme dhe të Përbashkëta të Qeverisë (ShQPPQ), Ivica Tomovski.
Tomovski i hodhi poshtë akuzat nga LSDM dhe njoftoi se do të ngrejë padi kundër partisë.
Bomba e tretë kishte të bënte me gjetjet për hyrjen e një banke të dyshimtë serbe në tregun financiar maqedonas, e cila, sipas tyre, është e afërt me presidentin serb Aleksandar Vuçiq dhe me kreun e VMRO-DPMNE-së në pushtet.
- LEXO: LSDM: Detaje të reja rreth tenderit “Posta”: pompohen 300.000 euro çdo vit
- LEXO: “Bombë” e re e LSDM-së: Një kompani me tre punonjës mori tendera nga Qeveria me vlerë 1.2 milion euro për dy muaj
- LEXO: “Bombë” e re nga LSDM: A po sjell qeveria e Mickoskit kapital të dyshimtë në Maqedoni përmes “bankierit të Vuçiqit”?