LSDM: Kryeministri fluturon për në Adriatik me aeroplan qeveritar, por nuk ka para për pagën minimale prej 600 eurosh
Kryeministri Hristijan Mickoski fluturoi drejt Detit Adriatik me aeroplan qeveritar, ndërsa nuk ka para për të rritur pagën minimale në 600 euro për punëtorët. Ky është reagimi i sotëm i Lidhjes Social Demokrate (LSDM) të opozitës pasi dje në televizionin Telma u raportua se nga qershori 2024 deri në dhjetor 2025, kryeministri e përdori aeroplanin qeveritar tre herë. Ai ishte një herë në Budapest, dhe më 10 gusht të vitit të kaluar u nis për në Split. Gjatë asaj periudhe, mediat raportuan gjithashtu se Mickoski do të pushonte në Kroaci për disa ditë, transmeton Portalb.mk.
“Kryeministri shijon luksin në kurriz të popullit. Ai madje shkon të notojë në detin Adriatik me aeroplan qeveritar. Ashtu si Nikolla Gruevski, ai bleu një ‘Mercedes’ për 600 mijë euro dhe mbante syze prej 60 mijë eurosh, ndërsa Mickoski ka ora dore prej 60 mijë eurosh dhe dëshiron të blejë një aeroplan të ri për udhëtime turistike”, thuhet në deklaratën e partisë.
Sipas LSDM-së, nuk ka para për punëtorët, nuk ka para për të rritur pagën minimale në 600 euro, ndërsa po shkurtohen 40 milionë euro për fermerët.
“Ndërsa Mickoski fluturon, punëtorët po fundosen. Qytetarët mezi ia dalin mbanë, duke luftuar me çmime të larta dhe paga të ulëta, ndërsa Mickoski luksozohet në një botë privilegjesh, arrogance dhe shpërdorimi. Sa u kushtoi qytetarëve ky luks i kryeministrit me aeroplanin qeveritar?”, pyet partia.
TV Telma, duke cituar dokumente nga Shërbimi për Çështje të Përgjithshme dhe të Përbashkëta në Qeveri, dje njoftoi se në cilat linja është përdorur më shumë aeroplani qeveritar, por edhe cilët anëtarë të Qeverisë e kanë përdorur më shumë në periudhën që nga formimi i qeverisë së kryeministrit Hristijan Mickoski, pra nga qershori 2024 deri në dhjetor 2025.
Sipas të dhënave, kryeministri Mickoski e ka përdorur aeroplanin qeveritar tre herë. Ai ka qenë një herë në Budapest, dhe më 10 gusht të vitit të kaluar është nisur për në Split. Gjatë asaj periudhe, mediat raportuan gjithashtu se Mickoski do të pushonte në Kroaci për disa ditë. Ai udhëtoi edhe për në Tiranë. Nuk ka të dhëna të plota për një fluturim nga Shkupi në Beograd, shkruhet se përdoruesi është kryeministri, por kolona e pasagjerëve është bosh.
Nga ministrat, aeroplani qeveritar është përdorur më shumë nga ministri i Transportit dhe zëvendëskryeministri Aleksandar Nikolloski, ndërsa ai më shpesh fluturoi për në Budapest. Ai e përdori aeroplanin 11 herë, gjashtë prej të cilave ishte atje. Vetëm presidentja Gordana Siljanovska-Davkova e përdori aeroplanin qeveritar më shumë se Nikolloski. Ajo fluturoi 13 herë. Ajo ishte në Tivat, Podgoricë, Tiranë, dhe kishte edhe fluturime për në Romë, Stamboll dhe Kopenhagen.
Ndërkohë Qeveria ka reaguar duke thënë se aeroplani qeveritar u përdor në përputhje me rregulloret dhe se opozita përhap hipokrizi dhe sensacionalizëm.
“Ne publikisht dhe pa mëdyshje theksojmë se avioni qeveritar u përdor ekskluzivisht në përputhje me rregulloret dhe aktet për përdorimin e tij, në përputhje me Rregulloren mbi kushtet dhe mënyrën e përdorimit të tij. Çdo përdorim regjistrohet, dokumentohet dhe i nënshtrohet kontrollit institucional. Asnjë aktivitet nuk është jashtë procedurave të përcaktuara, as nuk ka ndonjë formë abuzimi. Është veçanërisht simptomatike që opozita injoron me vetëdije dimensionin humanitar dhe shtetëror të përdorimit të avionit në situata emergjente. Publiku e di mirë se i njëjti avion u vu në veprim për të shpëtuar jetë njerëzore, përfshirë gjatë transportit dhe koordinimit të aktiviteteve që lidhen me të lënduarit nga zjarri tragjik në Koçan”, thonë nga Qeveria.
Ata shtojnë se është shqetësuese që e njëjta strukturë politike që akuzon sot “përdori avionin qeveritar në të kaluarën për udhëtime që mbetën thellësisht të diskutueshme në publik, përfshirë fluturimet për në Nish, në atë kohë pamë foto dhe deklarata nga udhëtimet në avionin qeveritar që manipuluan publikun”.
“Përpjekjet e sotme për moralizim nga të njëjtët aktorë përfaqësojnë një shembull klasik të hipokrizisë politike. Kur ishin në pushtet, ata shkatërruan standardet e llogaridhënies, abuzuan në maksimum me burimet zyrtare dhe kurrë nuk nisën reforma thelbësore; përkundrazi, ishte gjatë periudhës së tyre të qeverisjes që publiku dëshmoi abuzime të panumërta”, thuhet në reagimin e Qeverisë.
Kujtojmë se pas protestës së madhe më 28 janar, e cila kërkoi rritjen e pagave minimale dhe të gjitha pagave të tjera në vend, LSM mbajti bllokada të Parlamentit dhe Odës Ekonomike. LSM e bazon kërkesën e saj për rritje të pagave në rritjen e kostos së jetesës dhe rritjen e vlerës së shportës së konsumatorit të sindikatës.