Prej taksave tona jetojnë funksionarët në luks, ndërsa rrogat tona nuk na mjaftojnë deri me të dhjetin, protestuan sindikatat

Me një marshim nga ndërtesa e Lidhja e Sindikatave të Maqedonisë (LSM) deri te Kuvendi, Lidhja e Odave të Tregtisë dhe Qeveria, punëtorët protestuan sot duke kërkuar paga më të larta dhe një rritje të pagës minimale në 600 euro. Presidenti i Lidhjes së Sindikatave të Maqedonisë, Slobodan Trendafilot, tha para Parlamentit se do të kërkojnë ulje të pagave të zyrtarëve të zgjedhur, raporton SDK, përcjell Portalb.mk.

“Ne do të mbledhim 10,000 nënshkrime dhe do të bëhemi propozues të autorizuar të ligjeve dhe do të kërkojmë që pagat e funksionarëve të ulen me 80 përqind dhe që paga minimale të rritet. Nuk do t’ju lejojmë të luani me mundin dhe djersën e punëtorëve, nga taksat e të cilëve merrni pagën tuaj. Nëse nuk i rrisni pagat e punëtorëve, nëse nuk e rrisni pagën minimale, ne do t’ju ndjekim pagat. Ju e keni siguruar luksin tuaj nga taksat e punëtorëve. Ju nuk e meritoni luksin që ju është dhënë nga punëtorët. Ne nuk do t’ju lutemi, ne do të luftojmë”, tha Trendafilov.

Para Qeverisë foli Trpe Deanoski, president i Sindikatës së Punëtorëve nga Administrata, Organet Gjyqësore dhe Shoqatat e Qytetarëve, i cili tha se protesta nuk ishte organizuar për qëllime politike, por për vështirësitë e punëtorëve.

Kryeministri Hristijan Mickoski u bëri thirrje punëtorëve dhe punëdhënësve të merren vesh mes vete. Ai tha se secili ka të drejtë të protestojë, se paga minimale do të rritet në mars dhe se qëllimi i sindikatës është përllogaritje politike, e jo paga më të larta për punëtorët. 

“I kam parë kërkesat, ato nuk janë diçka e re. Absolutisht jam gjithmonë për të ardhura më të larta. Por e vërteta që duhet thënë është se disa persona nga udhëheqja e kësaj sindikate janë plotësisht të kapur nga ambicie dhe figura politike, dhe gjithçka që bëjnë ka një qëllim të tillë”, tha Mickoski.

Rritja e rregullt, ligjore e pagës minimale bëhet në muajin mars. Ajo harmonizohet me 50 për qind të rritjes së pagës mesatare neto të paguar për vitin paraprak dhe 50 për qind të rritjes së indeksit të kostos së jetesës për vitin paraprak. Për marsin 2026, kjo do të thotë rritje prej 1.500 deri në 2.000 denarë. 

Mile Boshkov, kryetar i Konfederatës së Biznesit, deklaroi se një rritje e jashtëzakonshme e pagës minimale do të ishte barrë e madhe për bizneset pa lehtësime në pagesën e kontributeve sociale. 

Protesta mbështetet nga partitë opozitare LSDM dhe Levica. 

Inflacioni në Maqedoninë e Veriut është rritur me 4,1 për qind në baza vjetore. Sipas të dhënave të Entit Shtetëror të Statistikave (ESHS), të publikuara më 8 janar, vetëm gjatë vitit 2025 çmimet janë rritur mesatarisht për 4,1 për qind, ndërsa çmimet me pakicë janë rritur për 3,7 për qind. 

Paga minimale aktuale është 24.379 denarë (397 euro). Kjo është 2,6 herë më pak se shporta e konsumit për dhjetorin 2025, e cila kap vlerën 65.492 denarë – aq sa ka llogaritur Lidhja e Sindikatave të Maqedonisë (LSM) se i nevojitet një familjeje për ta kaluar muajin. 

Në rajon, vetëm Kosova ka pagë minimale më të ulët se Maqedonia e Veriut, 384 euro. Paga minimale në Serbi varion nga 505 deri në 580 euro, në varësi të orëve të punës në muaj. Në Shqipëri është 440 euro, në Bosnje dhe Hercegovinë 525 euro, ndërsa më e larta është në Mal të Zi – 600 euro në muaj. 

• LEXO: Sindikatat sot protestojnë në Shkup, kërkojnë rritje të pagës minimale në 600 euro
• LEXO: Sindikata e Gazetarëve kërkon rritjen e pagës minimale dhe i bashkohet protestës së punëtorëve
• LEXO: Nesër protestë, kryetari i LSM: Edhe në 2022 përmes protestave dhe grevës arritëm rritjen e pagës minimale në RMV
• LEXO: LSM e kumtoi itinerarin e plotë për protestën e 28 janarit për rritjen e pagës minimale