Kuvendi i RMV-së shpalli konkurs për zgjedhjen e anëtarit të ri të Antikorrupsionit
Kuvendi i Republikës së Maqedonisë së Veriut shpalli konkurs publik për zgjedhjen e anëtarit të Komisionit Shtetëror për Parandalim të Korrupsionit, transmeton Portalb.mk.
Anëtar i Komisionit Shtetëror mund të emërohet personi i cili i plotëson këto kushte:
- të jetë shtetas i Republikës së Maqedonisë së Veriut dhe të ketë vend të përhershëm të jetesës në Republikën e Maqedonisë së Veriut;
- të ketë aftësi për punë;
- të ketë arsim të lartë me të paktën 300 kredi SETK ose nivelin VII/1 të arsimit në fushën nga fushën e shkencave juridike ose arsim të lartë me të paktën 240 kredi SETK ose nivelin VII/1 të arsimit në fushën e shkencave politike, të komunikimit ose ekonomike;
- të ketë të paktën 10 vjet përvojë pune pas përfundimit të arsimit të lartë, nga të cilat të paktën gjashtë vjet përvojë pune në fushat e zbulimit ose parandalimit të korrupsionit, sundimit të të drejtës ose qeverisjes së mirë;
- nuk i është shqiptuar ndalim për ushtrimin e funksionit, veprimtarisë ose detyrës;
- në 10 vitet e fundit, të mos ketë qenë deputet në Kuvendin e Republikës së Maqedonisë së Veriut, anëtar i Qeverisë së Republikës së Maqedonisë së Veriut, të mos ketë qenë donator një partie politike ose të mos ketë kryer funksion në organet e partisë politike;
- nuk e ka shfrytëzuar të drejtën nga neni 10 paragrafi (1), i këtij ligj
Personi i cili në çfarëdo mandati ka realizuar funksionin kryetar i Komisionit Shtetëror ose anëtar i Komisionit Shtetëror, pavarësisht nga kohëzgjatja e mandatit, nuk mund të zgjidhet përsëri as si kryetar dhe as si anëtar i Komisionit Shtetëror.
Kandidatët e interesuar fletëparaqitjet në të cilat do të theksojnë: adresën elektronike dhe numrin e kontaktit; biografitë personale dhe dokumentet që vërtetojnë përmbushjen e kushteve të lartpërmendura të këtij vendimi, në origjinal ose kopje të verifikuar nga noteri, të dorëzohen në Kuvendin e Republikës së Maqedonisë së Veriut brenda 10 ditëve nga dita e publikimit të këtij konkursi në Gazetën Zyrtare të Republikës së Maqedonisë së Veriut.
Kandidatët e interesuar, me dokumentet, duhet të dorëzojnë edhe deklaratë personale të verifikuar nga noteri.
“Njoftohen kandidatët që do të aplikojnë për këtë konkurs se të dhënat e tyre personale do të përpunohen ekskluzivisht për qëllime të zbatimit të procedurës së përzgjedhjes dhe një pjesë e tyre, në përputhje me Ligjin e Mbrojtjes së të Dhënave Personale, mund të publikohen në faqen e internetit të Kuvendit: sobranie.mk. Me parashtrimin e fletëparaqitjes, kandidati jep pëlqimin që të dhënat e tij personale të përfshira në aplikim dhe dokumentacionin shoqërues të përpunohen nga persona të autorizuar në Shërbimin e Kuvendit në përputhje me Ligjin e Mbrojtjes së të Dhënave Personale dhe të ruhen në përputhje me normat për punën e arkivit. Ky vendim do të publikohet në Gazetën Zyrtare të Republikës së Maqedonisë së Veriut dhe në gazetat ditore “Slloboden Peçat”, “Veçer” dhe “Koha”, në ueb faqen e Kuvendit të Republikës së Maqedonisë së Veriut dhe në ueb faqen e Komisionit Shtetëror për Parandalim të Korrupsionit”, thuhet në shpallje.
Përndryshe, shpallja është hapur pasi ish-anëtarja e antikorrupsionit, Cveta Ristovska dha dorëheqje për shkak të skandaleve të lidhura me të. KSHPK, ku ajo ishte anëtare, i hapi lëndë për konflikt interesi, sepse firma e djalit të saj kishte marrë para nga partitë para zgjedhjeve, si dhe për mosdeklarim të pasurisë së dy firmave në pronësi të djemve.
- LEXO: Cveta Ristovska dha dorëheqje nga pozicioni i saj si anëtare e KSHPK-së
- LEXO: Pasuria në antikorrupsionin e RMV-së, kryetarë që “fshihen” pas grave dhe prindërve
Kujtojmë se sipas Raportit në hije për Kapitullin 23 të Institutit për Politika Evropiane (EPI), ndryshimet e mëparshme në Kodin Penal kanë pasur ndikim negativ në trajtimin e rasteve të korrupsionit të profilit të lartë. Institucionet kryesore vazhdojnë të përballen me mungesë burimesh dhe kapacitetesh, ndërsa disa zhvillime institucionale dhe strategjike synojnë përmirësimin e sistemit antikorrupsion.
Edhe Komisioni Evropian, në raportin e fundit theksoi se Maqedonia e Veriut nuk ka bërë përparim në parandalimin dhe luftën kundër korrupsionit. “Korrupsioni mbetet i përhapur në shumë fusha dhe është një çështje shqetësuese serioze”, thuhet në raport.