Kryeministri i Kantonit të Sarajevës dha dorëheqje, shoferi i tramvajit u lirua nga paraburgimi pas aksidentit

Protestat në Sarajevë vazhduan edhe dje për shkak të aksidentit tragjik me tramvaj që ndodhi më 12 shkurt, në të cilin humbi jetën 23-vjeçari Erdoan Morankiq dhe katër persona u plagosën, përfshirë 17-vjeçaren Ela Jovanoviq, e cila pësoi lëndime të rënda. Tubimi i djeshëm u shënua nga dy ngjarje kyçe – dorëheqja e kryeministrit të Kantonit të Sarajevës dhe lirimi i shoferit të tramvajit nga paraburgimi, transmeton Portalb.mk.

Kryeministri i Kantonit të Sarajevës, Nihad Uk, ka dhënë dorëheqjen pas aksidentit që tronditi publikun dhe shkaktoi një valë pakënaqësie publike. Vendimi i tij erdhi mes protestave që kërkonin llogaridhënie nga institucionet përkatëse dhe ndryshime sistemike për të parandaluar tragjedi të ngjashme.

Në të njëjtën kohë, qytetarët u mblodhën para Gjykatës Kantonale në Sarajevë për të pritur lirimin e shoferit të tramvajit, i cili u lirua nga paraburgimi nga gjykata. Sipas raportimeve, gjykata hodhi poshtë kërkesën për caktimin e paraburgimit, pas së cilës turma e priti shoferin me thirrjet “Nuk je vetëm, Adnan”, duke i ofruar mbështetje. Ndër ata që e pritën ishin edhe kolegët e tij të shumtë nga transporti publik, shkruan N1 Sarajevo.

Kjo ishte protesta e tretë me radhë në të cilën qytetarët shprehën solidaritet me familjen e të riut të ndjerë dhe të plagosurit, por gjithashtu këmbëngulin në përcaktimin e përgjegjësisë së plotë për aksidentin. Ndërsa disa besojnë se dorëheqja e kryeministrit është hapi i parë politik, të tjerë thonë se kjo nuk është e mjaftueshme dhe se presin hapa konkretë nga institucionet.

Tragjedia ka ngritur çështje më të gjera të sigurisë së transportit publik, punës së shërbimeve përkatëse dhe përgjegjësisë politike, dhe protestat tregojnë se një pjesë e publikut nuk dëshiron që çështja të përfundojë me faj individual, por të kërkojë zgjidhje sistemike.