Kovaçevski-Ageler: SHBA-të duan ta shohin Maqedoninë sa më shpejt në BE
Kryeministri Dimitar Kovaçevski sot ka zhvilluar takim me ambasadoren amerikane në vend, Angela Price Ageler, ku u konfirmua edhe një herë mbështetja e fuqishme e SHBA-së për politikat evropiane të vendit, transmeton Portalb.mk.
“Ne vlerësojmë shumë vullnetin e mirë të miqve tanë amerikanë, të cilët përsëritën mesazhin se do të vazhdojnë së bashku me ne në rrugën evropiane në takimin e Liderit kushtuar Planit të Rritjes për Ballkanin Perëndimor.
Hapi ynë i radhës drejt integrimit evropian është shumë i pritur dhe i mbështetur ndërkombëtarisht si kurrë më parë. Besoj se ky moment do të njihet nga forcat pro-evropiane të shoqërisë që do të mbrojnë vizionin e një shteti europian. Pas këtij vizioni qëndron koncepti ynë për perspektivat evropiane dhe një të ardhme të sigurt evropiane kundër konceptit të pasigurisë dhe izolimit”, shkroi Kovaçevski në Facebook.
Kujtojmë se, ministri i Punëve të Jashtme, Bujar Osmani, më 11 janar prezantoi ndryshimet në Ligjin për masa kufizuese, të cilat do të zbatohen edhe në Maqedoninë e Veriut për personat që janë në “listën e zezë” të SHBA-së. Personat që do të jenë në “listën e zezë” të Shteteve të Bashkuara për korrupsion, krim të organizuar, shpërdorim detyre dhe kërcënime hibride do të përballen me pezullimin e përkohshëm të pozicionit që mbajnë, do t’u ndalohet të marrin pjesë në tenderë deri në aktgjykimin e formës së prerë, ndërsa në lojë mbetet edhe konfiskimi i pasurisë së fituar në mënyrë të paligjshme.
Ndryshe, Koço Angjushev, Orce Kamçev, Ramiz Merko, Sasho Mijalkov, Nikolla Gruevski janë vetëm disa nga personat që janë futur në “listën e zezë” të SHBA-së në periudhën e fundit. Biznesmeni dhe ish-zëvendëskryeministri Koço Angjushev ishte i fundit në “listën e zezë” të Shteteve të Bashkuara të Amerikës, për shkak të përfshirjes së tij në korrupsion masiv.