Hulumtim, komunat në RMV ndajnë para pa shpjegime e kritere dhe shpesh nuk dihet për kë
Komunat në Maqedoni keqpërdorin gjerësisht kompetencat e tyre diskrecionale dhe shpërndajnë para për individët dhe shoqatat e qytetarëve, të cilëve shpesh nuk u përmenden as emrat, tregon hulumtimi i Qendrës për Menaxhimin e Ndryshimeve (QMN). Hulumtimi i kryer në komunat Karposh, Kisella Vodë dhe Qendër të Shkupit dhe në Komunën e Kërçovës, me titull “Kompetencat diskrecionale si rrezik potencial i korrupsionit” zbuloi mjegullnajë të shumta dhe shkallë alarmante të ndarjes së paligjshme të mjeteve buxhetore pa vendim, arsyetim, kriteret dhe transparencë, transmeton Portalb.mk.
“Komunat vendosin sipas gjykimit të tyre se për çfarë do t’i japin paratë, nga trajtimi i një fëmije të sëmurë deri te riparimi i gardhit, sa do të jetë shuma dhe këtu tekstualisht nuk ka asgjë të ligjshme. Në shumicën e rasteve nuk ka asnjë procedurë, e lëre më kritere, nuk ka asnjë shans për të gjetur një vendim të arsyetuar. Nëse Komuna i ka dhënë 13 milionë denarë një klubi sportiv, nuk ka shpjegim pse kaq shumë”, thotë Jugosllav Gjorgjievski nga QMN, një nga autorët e hulumtimit.
QMN shtoi se ata gjetën vetëm katër-pesë vendime për raportin e tyre.
Si rregull, këto kompetenca duhen përdorur rrallë dhe justifikohen nga nevoja për të mbrojtur interesin publik. Megjithatë, në praktikë, përdorimi i kompetencave diskrecionale është shumë i përhapur, jo vetëm kur e lejon ligji, por edhe në rastet kur nuk ka bazë ligjore për përdorimin e tyre. Për shkak të gjithë kësaj, ata paraqesin një nga rreziqet më të mëdha për korrupsion, mendon QMN.
“Këtu kemi punuar në mënyrë strikte me para që njerëzit të shohin se çfarë shumash ndahen”, sqaroi Gjorgjievski.
Në raport thuhet se në vitin 2023, Komuna e Karposhit, ndër të tjera, ka dhënë para për ndërrimin e çatisë së asbestit të tre objekteve individuale të banimit, ka shpërblyer punëtorët shëndetësorë, punonjësit e administratës komunale për arritjen e suksesit në lojërat sportive sindikale, si dhe njerëz të tjerë për suksese sportive.
“Në të njëjtën kohë nuk ka asnjë justifikim për vendimet dhe as për kë po flasim. Ka edhe vendim për ndarjen e 300.000 denarë për një shoqatë qytetare, por nuk e dimë se cilën”, thonë nga QMN.
Një pikë e veçantë në raport është mbështetja financiare për klubet dhe organizatat sportive. Pra, Komuna Qendër, ndër të tjera, vitin e kaluar ka dhënë 650.000 denarë për lojëra sportive dhe 13.000.000 denarë për KB Rabotniçki, ndërsa Komuna e Karposhit ka ndarë një milion denarë për përkrahjen e klubeve sportive, 300.000 denarë për FC Lepenec, 500.000 denarë për lojëra sportive familjare dhe 700.000 denarë për banorët e Karposhit të cilët merren me aktivitete sportive dhe rekreative. Komuna e Kërçovës ka dhënë 3.000.000 denarë për sportet ekipore dhe 600.000 denarë për shkollat sportive.
QMN ka treguar edhe rastin nga Komuna e Karposhit për subvencionimin e kalimit të testit të vozitjes.
“Komuna askund nuk ka publikuar thirrje publike në formë të aktit administrativ dhe as vendim të Këshillit të Komunës së Karposhit, me të cilin përcaktohet kjo kompetencë e Komunës. Pasi që këto akte nuk janë publikuar, nuk mund të përcaktohet se në bazë të cilës dispozitë ligjore Komuna e publikon thirrjen publike, për të cilën ka ndarë 7.000.000 denarë (113.636 euro) nga buxheti i saj”, thonë nga QMN.