Gjermania forcoi mbrojtjen

Gjermania po planifikon një paketë të gjerë masash për të forcuar mbrojtjen e saj kundër sulmeve me dronë, ndërhyrjeve kibernetike dhe formave të tjera të sabotimit rus pas një tentative për sulm me dronë në aeroportin e Lajpcigut muajin e kaluar, raporton Klan.

Ministri i Brendshëm Alexander Dobrindt tha për gazetën Bild se sulmet hibride të Rusisë ishin bërë pjesë e realitetit të përditshëm.

“Këto sulme do të shtohen, por ne mund të mbrohemi dhe do të mbrohemi”, u citua të ketë thënë ai.

Gazeta raportoi se aftësitë mbrojtëse të policisë do të zgjeroheshin, me njësi të shpejta kundër dronëve të vendosura në qytete për të mbrojtur hapësirën ajrore mbi qendrat kritike të transportit dhe zonat qeveritare. Kompanitë që operojnë në infrastrukturën kritike, siç janë shërbimet e energjisë dhe prodhuesit e mbrojtjes, do të kenë autoritetin ligjor jo vetëm për të zbuluar dronë, por edhe për t’i interceptuar ato.

Sipas planit, do të krijohet edhe një sistem mbrojtës kombëtar, ose “kiberdome”, që përfshin një rrjet sensorësh digjitalë të projektuar për të zbuluar dhe kapur tentativat për hakerim.

Qeveria gjithashtu synon të zgjerojë përdorimin e teknologjive të mbështetura nga inteligjenca artificiale për njohjen biometrike të fytyrës dhe mbikëqyrjen me video.