Festivali “Teuta” përkujtoi Qefajete Beqirin, ndërsa ndau mirënjohje për Vladimir Hasimin
Edicioni i 12 i Festivalit të Këngës së Vjetër Qytetare “Teuta” mbrëmë mbushi sallën përplot me publik. Qendra e Kulturës jehoi nga zëra shumë të bukur dhe këngë të njohura burimore nga të gjitha trevat shqiptare. Të pranishëm ishin ansamblet popullore nga Tirana, Elbasani, Prishtina njofton Portalb.mk.
Mbrëmjen e hapi kori i grave “Teuta” që përbëhet nga zonjat e vyera të qytetit të Tetovës, shumica të pensionuara në profesione fisnike. Ato ishin dhe nikoqiret e këtij festivali që sivjet kishte edicionin e dymbëdhjetë me radhë. Drejtori i Qendrës Kulturore Arlind Huseini tha se ky festival për nga rëndësia është më seriozi dhe se i kushtohet shumë rëndësi bashkë me këshillin e formuar me artistët e njohur si Besarta Murtezanin, Jetmir Rexhepin dhe Jeton Pustinën. Emra këto të njohur pasi lidhen ngushtë me “Xheladin Xeqirin” dhe korin “Teuta”.
Post mortum u nderua emri i ish- anëtares së korit Qefajete Beqirit për themelimin dhe kontributin e veçantë në korin e grave të Tetovës “Teuta”. Në emër të familjes, çmimin e pranoi djali i të ndjerës, profesori Ilirjan Beqiri.
Orkestrën “Teuta” e drejtoi Bekim Ramadani, ndërsa e dirigjoi Anita Alii.
“Ky festival është një platformë e rëndësishme për të promovuar trashëgiminë kulturore të muzikës së vjetër qytetare shqiptare dhe për të festuar vlerat kulturore në Tetovë.” – thuhet në faqen zyrtare të festivalit.
Pjesëmarrës ishin ansamblet e njohura shtetërore nga Tirana dhe Prishtina si dhe ansambli nga Elbasani, të cilat sollën një frymë përbashkuese pasi i shërbejnë kulturës së njejtë. Drejtori artistik i Ansamblit “Shota” Ylber Asllanaj tha se ky festival e ka për qëllim kultivimin dhe ruajtjen e kulturës dhe traditës shqiptare pasi i shërbejnë trashëgimisë së një kombi, kështu ansambi i tyre kishte dy këngë elbasanase edhe pse është i Prishtinës edhe pse vet Elbasani ishte i pranishëm me repertorin e vet. Këto takime janë me rëndësi të veçantë dhe shumë të dashura mes publikut shqiptar që kënaqet duke shijuar këngët shqipe.
Mirënjohje u nda edhe për udhëheqësin e orkestrës së Ansamblit Kombëtar të Tiranës Vladimir Hasimin i cili para disa muajsh edhe u pensionua. Ladi, siç e njohin të gjithë lavdëroi punën që bëhet me Ansamblin ” Shota” si dhe punën e drejtorit Asllanaj i cili është shembull se si drejtohet një ansambël, sipas tij.
Festivali “Teuta” është një mundësi e jashtëzakonshme për të kultivuar dhe për të festuar muzikën e vjetër qytetare dhe për të ndihmuar në transmetimin e trashëgimisë kulturore te brezat e rinj.
Shumë instrumentistë, shumë këngëtarë me veshje popullore të zonave, me këngë nga më të ndryshmet që siç theksoi dhe Drejtori i ” Shotës” Mehmet Xhemajli jemi ndër të rrallët popuj të Ballkanit me një pasuri të tillë veshjesh, këngësh, vallesh pasi dhe vet i kishte studiuar si profesor i koreografisë. Besarta Murtezani solli një duet të mrekullueshëm me Jetmir Rexhepin të shoqëruar në harmonikë nga Vladimir Hasimi. Po ashtu korin e shoqëruan këngëtarët e rinj si Melisa Loki dhe Leotrim Zejnullahi. Solistët tjerë të grupeve artistike u prezantuan denjësisht duke sjellë këngë me timbre të veçanta interpretimi.