Eurointegrimet në ngërç, Mickoski: S’ka më lëshime për anëtarësim në BE, jemi të gatshëm ta paguajmë çmimin
Kryeministri Hristijan Mickoski, dje pas takimit me kryeministrin kroat Andrej Plenkoviq në Ohër, tha se qëllimi strategjik i vendit mbetet anëtarësimi në Bashkimin Evropian (BE), por se procesi i integrimit evropian padrejtësisht është shndërruar në një çështje bilaterale në vend që të bazohet në kriteret e Kopenhagës dhe meritat e shtetit. Ai tha se Qeveria do të përqendrohet në reformat e brendshme, Planin e rritjes dhe Agjendën e reformave ku, siç tha ai, Maqedonia është ndër vendet më të suksesshme në rajon, transmeton Portalb.mk.
Ai tha se me kryeministrin Plenkoviq nënshkruan një Marrëveshje për bashkëpunim strategjik midis dy qeverive, për të cilën tha se është “më shumë se një akt diplomatik”, si dhe se integrimi evropian ka qenë një nga temat më të rëndësishme të bisedimeve.
Mickoski tha edhe se nuk do të ketë lëshime të reja rreth identitetit dhe se Qeveria është e përgatitur ta paguajë çmimin për ruajtjen e interesave kombëtare.
“Për fat të keq, për sa kohë që mosmarrëveshjet dypalëshe ose bullizimi ndaj nesh nga disa shtete anëtare, ose në këtë rast një shtet anëtar, janë pengesa jonë për të qenë pjesë e asaj familjeje, ajo që kemi kohë që e kemi merituar do të na largohet. Por ne nuk humbim shpresë, nuk humbim energji, por, përkundrazi, do të vazhdojmë të punojmë fuqishëm dhe të presim se do ta kemi atë mundësi për të qenë pjesë e asaj familjeje. Nuk ka më mundësi për lëshime për identitetin, nuk ka më mundësi për një hap prapa kur bëhet fjalë për përcaktuesit tonë kombëtarë. Cilido që të jetë çmimi që duhet ta paguajmë, kjo Qeveri është e gatshme ta paguajë. Do presim kohëra të tjera më të mira. Nëse proceset bilaterale janë vërtet ato që duhet të vendosin për rrugën tonë evropiane, atëherë ne do të luftojmë në një mënyrë tjetër”, tha kryeministri Mickoski.
Ai tha se Maqedonia për momentin është ndër vendet më të suksesshme në rajon sipas vlerësimeve të Komisionit Evropian (KE). Sipas tij, shumica e fondeve të destinuara për vendet e Ballkanit Perëndimor duhet të përfundojnë në buxhetin e Maqedonisë, ndërsa trendi pozitiv pritet të vazhdojë edhe në raportin e ardhshëm në qershor.
Ai tha se Maqedonia ka kohë që e ka merituar vendin e saj në BE, por sipas tij, Qeveria e mëparshme e ka vështirësuar edhe më tej procesin duke pranuar kërkesa që nuk kanë qenë në interes të vendit.
Ndërkohë, kujtojmë se koalicioni VLEN para ardhjes në pushtet premtoi se ndryshimet kushtetuese do të miratoheshin brenda gjashtë muajve, por një gjë e tillë nuk ndodhi. Nga ana tjetër, VMRO-DPMNE vazhdimisht ka qenë kundër ndryshimeve kushtetuese dhe, pas formimit të Qeverisë, retorika e saj edhe më tej e tensionoi atmosferën politike rreth këtij procesi, duke e bërë më të vështirë arritjen e konsensusit për vazhdimin e integrimit evropian.
Kurse fitorja bindëse e Rumen Radevit në zgjedhjet parlamentare të prillit 2026 në Bullgari shënon një kthesë të rëndësishme politike për vendin, megjithatë, pritshmëritë për një përparim të shpejtë në raportet mes Bullgarisë dhe Maqedonisë së Veriut mbeten të ulëta.
Maqedonia e Veriut mbetet e ngujuar në rrugëtimin drejt BE-së, shkaku i kontestit me Bullgarinë fqinje. RMV duhet t’i bëjë ndryshimet kushtetuese për të vazhduar rrugën drejt BE-së. Ndryshimi kushtetutës përfshin shtimin e bullgarëve dhe etnive tjera në Kushtetutë. Ndryshimi kërkon shumicë prej dy të tretash dhe negociatat me BE-në nuk do të fillojnë derisa të bëhen këto ndryshime.
Me kusht të ndryshimi të Kushtetutës, Maqedonia e Veriut më 19 korrik të vitit 2022 i filloi bisedimet qasëse me BE-në me mbajtjen e konferencës së parë ndërqeveritare, pas miratimit të propozimit francez të cilin Maqedonia e Veriut e miratoi më 16 korrik 2022. Propozimi atë kohë u votua në parlament pa pjesëmarrjen e opozitës së atëhershme e cila tani është në pushtet.