Xhaferi – Ageler: Zgjedhja e kryeministrit të parë shqiptar, konfirmim i fuqishëm i demokratizimit të RMV-së
Kryeministri i Maqedonisë së Veriut, Talat Xhaferi, sot realizoi takim me ambasadoren e Shteteve të Bashkuara të Amerikës në vend, Anxhela Prajs Ageler. Në takim, Kryeministri dhe ambasadorja diskutuan për nevojën e sigurimit të vazhdimësisë dhe efikasitetit në punën e Qeverisë dhe institucioneve shtetërore, dhe për bërjen e përpjekjeve të përgjithshme për përgatitjen dhe realizimin e zgjedhjeve korrekte dhe demokratike, transmeton Portalb.mk.
Kryeministri Xhaferi theksoi se zgjedhjet presidenciale dhe parlamentare janë vendimtare për të ardhmen e vendit dhe do të jenë një konfirmim i kahut të lëvizjes së tij të mëtejshme. Në këtë drejtim, të dy bashkëbiseduesit ranë dakord se procesi i negociatave për anëtarësim në BE do të mundësojë edhe transformim pozitiv të kapaciteteve demokratike në shtet, përforcim të proceseve reformuese në sferën e sundimit të së drejtës dhe luftën kundër korrupsionit.
Ambasadorja Ageler ia uroi Kryeministrin Xhaferi zgjedhjen e tij, duke e theksuar rëndësinë e rolit të tij në zhvillimin demokratik të vendit si Kryetari i parë shqiptar i Kuvendit, dhe Kryetari i parë shqiptar i Qeverisë së Maqedonisë së Veriut në historinë e vendit. Ageler theksoi se zgjedhja e Kryeministrit Xhaferi dërgon një mesazh të fuqishëm, si në Shtetet e Bashkuara të Amerikës, ashtu edhe në Maqedoninë e Veriut, se diversiteti dhe respektimi i trashëgimisë së pasur kulturore e bëjnë vendin edhe më të fuqishëm. Ambasadorja e theksoi mbështetjen e fuqishme të SHBA-ve në rrugën e Maqedonisë së Veriut drejt Bashkimit Evropian dhe shprehu gatishmëri për bashkëpunim të mëtejshëm të ngushtë me Qeverinë në këtë rrugë.
Kryeministri Xhaferi e potencoi përcaktimin e Qeverisë për vazhdimin aktiv të proceseve dhe reformave në lidhje me integrimin evropian të Maqedonisë së Veriut, me qëllim të hapjes së mundësive të reja për prosperitet më të madh ekonomik dhe zhvillim demokratik. Ndër të tjera, Kryeministri e njoftoi ambasadoren edhe për vendimin e Qeverisë të tërheqë Propozim-ligjin për masat restriktive për të cilin bëhen konsultime shtesë dhe gjithëpërfshirëse, pas së cilave parashikohet shqyrtimi i serishëm i të njëjtit në mbledhjen e ardhshme të Qeverisë.
Kryeministri Xhaferi shprehu mirënjohje për mbështetjen e vazhdueshme të SHBA-ve për stabilitetin dhe prosperitetin e Maqedonisë së Veriut dhe theksoi se kontributi ynë për sigurinë kolektive si vend anëtar i NATO-s do të vazhdojë.
Kujtojmë se kryeministri Xhaferi, sot gjatë ditës u takua edhe me eurodeputetin Ilhan Kjuçuk, raportues në Parlamentin Evropian për Republikën e Maqedonisë së Veriut.
Në takim u shkëmbyen mendime për përparimin e shtetit në kontekst të integrimit në Bashkimin Evropian, si dhe për situatën e brendshme politike para zgjedhjeve të ardhshme parlamentare dhe presidenciale. Kryetari i Qeverisë, Xhaferi, theksoi se anëtarësimi në Bashkimin Evropian mbetet synim strategjik i Republikës së Maqedonisë së Veriut, andaj zotim i fuqishëm i Qeverisë mbetet përmbushja e obligimeve që janë pjesë e kornizës së negociatave me BE-në.