Vendimi për luftë apo paqe në Ukrainë nuk ishte në duart e NATO-s dhe Amerikës

By N. D. On 26/09/2023 11:40

Vlodimir Zelenski në Samitin e NATOS në Vilinus. Foto: Printscreen nga faqja zyrtare në Facebook e Vlodimir Zelenskit

Fakti që Putini i dërgoi një kërkesë NATO-s që të mos zgjerohej, e cila u refuzua, pra një projekt-marrëveshje e tillë nuk u nënshkrua nga NATO, nuk e transferon përgjegjësinë ushtarake te NATO. Stoltenberg, ndryshe nga sa thuhej në njoftim, nuk e pranon se NATO mund ta pengonte luftën duke i dhënë fund zgjerimit, por në video thotë se kjo është e papranueshme, shkruan Vërtetmatësi.

Po shqyrtojmë një postim në rrjetin social Facebook ku shkruhet:

Kartat janë të hapura: Vendimi për luftë apo paqe në Ukrainë ishte në duart e Amerikës dhe NATO-s. Sekretari i Përgjithshëm i NATO-s Jens Stoltenberg konfirmoi se Rusia sulmoi Ukrainën për të parandaluar ekspansionizmin e NATO-s. Stoltenberg pranon gjithashtu se NATO mund ta kishte parandaluar luftën duke i dhënë fund zgjerimit të NATO-s dhe duke respektuar Aktin NATO-Rusi të vitit 1997. A po përgatitet kjo Amerikë për një marrëveshje paqeje Putin/Biden me Rusinë, një JALTA të re dhe ndarjen e BE-së, NATO-s brenda kufijve të para vitit 1991, duke pasur parasysh deklaratën e vitit të kaluar të Stoltenberg: Nëse Ukraina humbet, ne do të humbasim shumë. Pyetja është kush janë ata, “ne”.

Brenda postimit është një video deklaratë e Stoltenberg në të cilën ai shpjegon ultimatumet dhe shantazhet që NATO ka marrë nga Rusia në formën e një “draft-marrëveshjeje” që Putin donte që NATO të nënshkruante dhe me të cilën NATO do të premtonte se nuk do të zgjerohej më tej. Ky, sipas Stoltenberg, ishte kushti i Putinit për të mos sulmuar Ukrainën. Putini donte që NATO të nënshkruante me shkrim se nuk do të zgjerohej më dhe se donte që NATO të hiqte infrastrukturën nga të gjithë aleatët që iu bashkuan NATO-s pas vitit 1997. Stoltenberg më pas shton se Putini filloi një pushtim ushtarak për të ndaluar NATO-n të kalonte kufirin.

Ai mori të kundërtën. Fitoi një prani më të madhe të NATO-s në pjesën lindore të aleancës dhe Finlanda iu bashkua Aleancës, me Suedinë që së shpejti do të bëhet anëtare e plotë. Kjo është e mirë për vendet nordike, për Finlandën dhe Suedinë si dhe është e mirë për NATO-n dhe tregon se kur presidenti Putin pushton një vend evropian për të parandaluar NATO-n, ai merr saktësisht rezultatin e kundërt, tha Stoltenberg.

Pra, ndryshe nga sa thuhet në postimin që po rishikojmë, vendimi për luftë apo paqe në Ukrainë nuk ishte në duart e NATO-s dhe Amerikës, por në duart e Rusisë, e cila filloi pushtimin ushtarak të një shteti sovran dhe demokratik, pa asnjë provokim. Fakti që Putini i dërgoi një kërkesë NATO-s që të mos zgjerohej, e cila u refuzua, pra një projekt-marrëveshje e tillë nuk u nënshkrua nga NATO, nuk e transferon përgjegjësinë te NATO. Stoltenberg, ndryshe nga sa thuhej në njoftim, nuk pranon se NATO mund ta parandalonte luftën duke i dhënë fund zgjerimit, por në video thotë se kjo është e papranueshme.

Zgjerimi i NATO-s nuk u diskutua midis SHBA-së dhe BRSS në vitin 1989

Nuk ka asnjë dokument të shkruar sipas të cilit NATO nuk duhet të zgjerohet në të ardhmen, dhe çdo vend, përfshirë Ukrainën, ka të drejtë të vendosë në mënyrë sovrane për të ardhmen e tij, duke përfshirë se me kë do të jetë në anën e politikës ndërkombëtare. Kontrolluesit e fakteve të Politifact që në vitin 2022 e kontrolluan këtë dhe me fakte arritën në përfundimin se jo vetëm që asnjë marrëveshje ligjore nuk e ndalon NATO-n të zgjerohet në Lindje, por edhe se nuk ka asnjë marrëveshje mes pjesëmarrësve të asaj kohe që të ketë pasur një bisedë për atë temë midis përfaqësuesve më të lartë amerikanë dhe gjermanë dhe presidentit të fundit të Bashkimit Sovjetik, Mikhail Gorbachev. Më konkretisht, disa burime pohojnë se u diskutua vetëm për një Gjermani të bashkuar si anëtare e NATO-s.

Nuk ka asnjë marrëveshje të nënshkruar nga SHBA, Evropa dhe Rusia që NATO nuk do të zgjerohet. Ideja e zgjerimit të NATO-s përtej Gjermanisë nuk ishte në rendin e ditës në vitin 1989, sepse Traktati i Varshavës ekzistonte. Kjo u konfirmua nga Mikhail Gorbachev në një intervistë në vitin 2014.

Tema e zgjerimit të NATO-s nuk u diskutua fare dhe as nuk ishte temë në ato vite. Unë këtë e them me përgjegjësi të plotë. Asnjë vend i Evropës Lindore nuk e ngriti këtë çështje edhe kur Pakti i Varshavës pushoi së ekzistuari në 1991. Udhëheqësit perëndimorë gjithashtu nuk e diskutuan atë, tha Gorbachev, sipas faqes së internetit të NATO-s.

Transkriptet e deklasifikuara të Shtëpisë së Bardhë konfirmojnë gjithashtu se në vitin 1997, Bill Clinton refuzoi vazhdimisht propozimin e Boris Yeltsin për një marrëveshje “xhentëlmene” që asnjë ish republikë sovjetike të mos anëtarësohej në NATO.

Unë nuk mund të angazhohem në emër të NATO-s dhe nuk do ta vë veten në një pozicion për të vënë veton ndaj zgjerimit të NATO-s në lidhje me ndonjë vend, aq më pak do të lejoj një tjetër ta bëjë këtë. NATO punon me konsensus, tha Clinton.

Sipas deklaratës, asnjëherë nuk u arrit një marrëveshje me të cilën NATO i premton Rusisë se nuk do të zgjerohet pas Luftës së Ftohtë. Dera e NATO-s ka qenë e hapur për anëtarët e rinj që nga themelimi i aleancës në vitin 1949 dhe kjo nuk ka ndryshuar kurrë.

Politika e dyerve të hapura gjendet në nenin 10 të marrëveshjes themeluese të NATO-s, ku thuhet se çdo vend tjetër evropian, i cili mund të forcojë parimet e marrëveshjes dhe të kontribuojë në sigurinë e NATO-s, mund t’i afrohet anëtarësimit. Vendimet e anëtarësimit merren me konsensus midis anëtarëve.

NATO nuk e filloi luftën dhe as nuk ka trupa të veta në Ukrainë

NATO nuk është nxitësi i luftës në Ukrainë dhe as nuk mund ta parandalojë atë. NATO as nuk e filloi pushtimin ushtarak dhe as nuk ka trupa të veta në Ukrainë. Është Rusia ajo që sulmoi Ukrainën në shkurt 2022 dhe Ukraina si një vend i pavarur ka të drejtë të mbrohet dhe të përdorë fondet në dispozicion të marra si ndihmë nga miqtë e saj. NATO po dërgon ndihmë ushtarake në Ukrainë, pa qenë pjesëmarrëse në luftë.

Lufta mund të përfundojë menjëherë nëse Rusia tërhiqej nga territori i Ukrainës. NATO është një aleancë mbrojtëse me qëllimin kryesor mbrojtjen e anëtarëve të saj dhe politikat zyrtare të NATO-s janë që ajo të mos kërkojë konfrontim dhe të mos jetë kërcënim për Federatën Ruse. NATO nuk pushtoi Gjeorgjinë, nuk pushtoi Ukrainën, por Rusia e pushtoi.

Për të gjitha faktet e mësipërme, ne e vlerësojmë postimin që po shqyrtojmë si të pavërtetë.

Disinfohub NATO Shtetet e Bashkuara të Amerikës (SHBA)Ukraina Vertetmatës recension - verifikim i fakteve