Vdiq fëmija dyvjeçar që u plagos natën e Vitit të Ri në RMV, kishte pësuar dëmtim të rëndë në tru
Fëmija dyvjeçar që u lëndua gjatë natës së ndërrimit të viteve dhe më pas u shtrua në spital në Qendrën Klinike “Nëna Terezë” në Shkup vdiq sot në mëngjes si pasojë e lëndimeve të rënda në tru të shkaktuara nga një trup i huaj metalik. Klinika e Neurokirurgjisë në Shkup e deklaroi këtë sot për MIA-n, duke treguar se do të priten interpretime të mëtejshme nga rezultatet e autopsisë. Ndërkohë rastin tragjik e konfirmoi edhe Ministria e Shëndetësisë, transmeton Portalb.mk.
“Për interpretime të mëtejshme, do të presim rezultatet e ekzaminimeve dhe hetimeve mjeko-ligjore nga Ministria e Punëve të Brendshme”, njoftoi Klinika.
Ndërkohë nga Ministria e Shëndetësisë informuan se fëmija u pranua në Qendrën e Urgjencës dhe, për shkak të gjendjes së rëndë shëndetësore, u transferua për trajtim në Klinikën e Neurokirurgjisë, në repartin e kujdesit intensiv. Ai u intubua, u vendos në ventilim mekanik, iu administrua terapi antibiotike dhe antiedematoze, si dhe ishte nën monitorim të vazhdueshëm 24-orësh. Shkalla e dëmtimit të indit trunor nuk lejoi ndërhyrje kirurgjikale. Pavarësisht përpjekjeve maksimale të ekipit mjekësor, përfundimi ishte tragjik.
“Shprehim ngushëllimet tona më të thella dhe më të sinqerta për familjen dhe të afërmit në këto momente jashtëzakonisht të vështira. Edhe një herë u bëjmë apel të gjithë qytetarëve që festat e Vitit të Ri të shënohen në mënyrë të qetë dhe dinjitoze, pa përdorimin e mjeteve piroteknike, fishekzjarrëve, e veçanërisht pa përdorimin e armëve të zjarrit. Pasojat e një sjelljeje të tillë të papërgjegjshme janë serioze dhe, për fat të keq, mund të jenë edhe fatale”, thanë nga Ministria e Shëndetësisë.
Informacionin për vdekjen e fëmijës e konfirmoi sot edhe Prokuroria, e cila tregoi se tashmë është lëshuar urdhër për autopsi të trupit.
“Lidhur me fëmijën e ndjerë dyvjeçar, Prokuroria Themelore Publike (PP) Shkup lëshoi urdhër për autopsi të trupit”, tha Prokuroria në një deklaratë.
Dje, mjekët, duke njoftuar numrin e të lënduarve gjatë natës së ndërrimit të viteve, e vlerësuan rastin e fëmijës dyvjeçar, i cili u shtrua në kujdes intensiv me një plagë me armë zjarri në kokë nga një armë zjarri, si rast serioz.
Duke komentuar rastin, Ministri i Brendshëm Pançe Toshkovski tha dje se ngjarja është nën hetim dhe se ka disa teori se si ka ndodhur incidenti.
Ai theksoi se fëmija është plagosur rëndë dhe është në gjendje kërcënuese për jetën.
“Bëhet fjalë për fragment metali, por në këtë pikë nuk mund të themi me siguri se si ka ndodhur saktësisht lëndimi. Ka disa teori rreth ngjarjes dhe sapo të përcaktohen shkaqet, publiku do të informohet”, tha ai.
Policia ende nuk ka publikuar detaje rreth vendit ku ka ndodhur ngjarja, si dhe rrethanave në të cilat ka ndodhur.