Tripunovski: Nuk ndihem përgjegjës dhe nuk do të jap dorëheqje, përpjekjet e opozitës për të më përfshirë në skandalin IPARD janë të dobëta

By N. D. On 17/11/2025 09:42

Cvetan Tripunovski. Foto nga profili i tij në Facebook

“Përgjegjësinë në këtë moment duhet ta japë ai që kapet në flagrancë duke kryer abuzim dhe shkelje të ligjeve. Mendoj se hetimi do të zhvillohet deri në fund, apeloj që të zhvillohet deri në fund dhe të gjithë ata që janë të përfshirë ndoshta në të gjithë çështjen të mbahen përgjegjës. Vetëm në këtë mënyrë do të ndalojmë tendencat negative, shkeljet e ligjeve dhe sjelljet devijante”, tha ministri i Bujqësisë, Cvetan Tripunovski në një intervistë në Kanal 5, transmeton Portalb.mk.

“Si ministër përkatës, do të vazhdoj të luftoj dhe që raste të tilla të sanksionohen plotësisht, vetëm në këtë mënyrë do të jemi në gjendje të ndërtojmë atë që kam thënë gjatë gjithë kohës, besimin në institucione, i cili mungonte në të kaluarën”, shtoi ai.

Tripunovski theksoi se Qeveria po zhvillon luftë pa dallim kundër krimit, duke treguar se pavarësisht përkatësisë politike, kushdo që kryen abuzim duhet të mbajë përgjegjësi.

“Me këtë rast, ju shihni se si një qeveri serioze, pavarësisht nga përkatësia partiake, qoftë një zyrtar aktual apo ish-zyrtar, ne po luftojmë pa asnjë problem. Kjo është një qasje serioze e një qeverie serioze, gjë që nuk ka qenë rasti në të kaluarën”, tha ai.

Ministri Tripunovski u bëri thirrje çdo qytetari që mund të ketë informacione të caktuara për një rast tjetër të ngrejë alarmin, në mënyrë që, siç tha ai, të merren masa dhe sanksione të menjëhershme.

Tripunovski i hodhi poshtë akuzat e opozitës dhe tha se Agjencia e pagesave është një organ i veçantë nga ministria, duke shtuar se përpjekjet e LSDM-së për ta përfshirë atë në këtë rast janë të dobëta.

“Agjencia e pagesave është organ i veçantë që i jep llogari Qeverisë. Pra, këtu unë eliminoj çdo lidhje midis Agjencisë së pagesave dhe Ministrisë. Ju e dini që Agjencia e pagesave punon sipas masave të akredituara, sipas udhëzimeve nga Brukseli, sipas procedurave, të menaxhuara nga një drejtor me ekipin e tij të menaxhimit. Pra, të gjitha proceset brenda Agjencisë së pagesave drejtohen nga vetë agjencia dhe këtu sulmet e opozitës për të lidhur ministrinë me Agjencinë e pagesave zbehen në krahasim. Pra, ajo që po bëjnë është më shumë për pikë politike dhe dukshmëri publike”, shpjegoi ai.

Vetëm dy ditë pasi Bashkimi Evropian publikoi Raportin e Progresit më 4 nëntor, në të cilin paralajmërohej urgjentisht nevoja për kontroll më të fortë, transparencë dhe luftë kundër korrupsionit në fondet IPARD, në Maqedoninë e Veriut shpërtheu një skandal i madh. Më 6 nëntor, policia arrestoi pesë persona, mes tyre zyrtarë shtetërorë dhe ndërmjetës, nën dyshimet për ryshfet, ndikim të paligjshëm dhe nënshkrim të paligjshëm të marrëveshjeve për fonde IPARD. Rasti dyshohet të ketë përfshirë pagesa të mëdha në këmbim të fondeve për kompani që nuk i plotësonin kushtet. Ironikisht, vetëm pak ditë më herët BE kishte kërkuar pikërisht forcim të sistemit të kontrollit, transparencës dhe kapaciteteve administrative për të parandaluar pikërisht parregullsi të tilla. Skandali e vërtetoi në mënyrë dramatike se rekomandimet e Brukselit ishin më urgjente se kurrë.

Ndër pikat më të rëndësishme të raportit të progresit të BE-së, ishte kërkesa që organet IPARD të parandalojnë, zbulojnë dhe raportojnë parregullsitë, si pjesë e masave kundër korrupsionit.

“Sa i përket masave kundër korrupsionit, organet IPARD janë të detyruara të parandalojnë, zbulojnë dhe raportojnë parregullsitë”, thuhet në raport.

Pikërisht kjo pikë u godit nga skandali që shpërtheu: pesë persona u arrestuan nën dyshimin për ryshfet, ndikim të paligjshëm dhe mashtrim me fondet IPARD. Sipas hetimeve, drejtori i Agjencisë për Mbështetje Financiare në Bujqësi dyshohet se ka nënshkruar marrëveshje të kundërligjshme, duke u premtuar fonde kompanive që nuk plotësonin kriteret, në këmbim të dhuratave të majme, një prej tyre në shumën prej 50.000 eurosh. Tre ndërmjetës, mes tyre edhe zyrtarë shtetërorë, dyshohet se ushtruan ndikim të jashtëligjshëm për të mundësuar vendimin. Gjatë bastisjeve u gjetën fonde të konsiderueshme, duke konfirmuar dyshimet për korrupsion sistemik.

Në këtë mënyrë, skandali i fundit jo vetëm që vërteton paralajmërimet e BE-së për dobësi institucionale, mungesë kontrolli dhe kapacitete të pamjaftueshme, por edhe tregon se rekomandimet për forcimin e mekanizmave kundër korrupsionit ishin urgjente dhe të justifikuara.