Trençevska: Është e padrejtë të barazohen pensionet e personave që kanë 15 vjet dhe atyre me 40 vjet përvojë pune

By F. Xh. On 16/08/2023 18:32

Ministrja e Punës dhe Politikës Sociale, Jovana Trenchevska, deri në fund të vitit pret të gjendet një zgjidhje e duhur për harmonizimin e pensioneve. Ajo sot deklaroi se në takimet me Bordin iniciativ të pensionistëve të Maqedonisë dhe me Lidhjen e shoqatave të pensionistëve, është rënë dakord që çështja e pensionit minimal të zgjidhet përmes grupit punues, transmeton Portalb.mk.

“Takimi edhe me Bordin inicues edhe me Lidhjen e Pensionistëve ka qenë konstruktiv, kemi dëgjuar kërkesat. Në seancën e djeshme të Qeverisë ramë dakord që unë si ministre e Punës dhe Politikës Sociale të dorëzoj informacion me të cilin do të formojmë grup punues për të vazhduar me atë që e lamë për shkak të pushimeve verore, që është çështja e pensionit minimal, pra ndryshimet në ligjin për pensionet, ku do të përcaktojm masë për pensionin minimal në shtet, por në përputhje me gjithçka që nënkupton stabilitetin e Fondit të Sigurimit Pensional dhe Invalidor dhe çfarë do të thotë kapaciteti i shtetit për sa i përket implikimeve fiskale”, tha Trençevska.

Ajo informoi se nga shtatori pensionistët presin korrigjim të ri të pensioneve, ndërsa përqindja e saktë e rritjes do të dihet këto ditë pasi Ministria të marrë informacion nga Enti Shtetëror i Statistikave.

“Ne jemi ulur të punojmë, do të udhëheqim dialogun dhe mendoj se deri në fund të vitit do të gjejmë një zgjidhje të përshtatshme, natyrisht duke ndjekur shembujt e vendeve të tjera, se si të përcaktohet pensioni minimal në vend”, tha ministrja.

Lidhur me kërkesat e disa pensionistëve të adresuar në protestën e djeshme, Trençevska tha se pensioni minimal prej 18.000 denarë është “joreal”, sepse paga minimale ka qenë rreth 20.000 denarë.

Ministrja theksoi se duhet të merret parasysh stabiliteti i Fondit të Sigurimit Pensional dhe Invalidor, ndërsa shumat e tilla do ta rëndonin atë.

Pensionet janë kategori ekonomike, shtoi ajo, dhe shuma e tyre varet nga sa investojmë në sistemin pensional gjatë viteve të punës.

“Është e padrejtë të barazosh personat që kanë 15 vite shërbim dhe personat që kanë 40 vite punë, sepse me 40 vite punë, absolutisht me kontributin tënd në sistemin e pensioneve, nëpërmjet kontributeve, pret të kesh një pension më të madh. Ata pensionistë që aktualisht marrin pension minimal, shumica e tyre kanë 15 vite punë”, shtoi Trençevska.

E pyetur për rritjen e moshës për pensionim, Trençevska u përgjigj se deri më tani nuk është diskutuar për një gjë të tillë, por fokusi ishte te “pensionet më të mëdha në kontekst të krizës ekonomike dhe energjetike”.

Jovanka Trençevska Ministria e Punës dhe Politikës Sociale (MPPS)Pensionist(e) Pension Shoqata e pensionistëve RMV