Të vdekur dhe të plagosur pas të shtënave në një shkollë në Kanada

Disa persona janë vrarë gjatë të shtënave me armë në një shkollë në provincën perëndimore kanadeze të British Columbia. Autoritetet thonë se të paktën tetë persona janë vrarë. Të paktën 25 persona janë plagosur, disa prej tyre në gjendje kritike. Një trup që besohet të jetë ai i të dyshuarit. Sipas mediave kanadeze, besohet të jetë grua. Identiteti nuk është konfirmuar ende zyrtarisht, transmeton Dojçe Vele (DW).

Sipas policisë, i dyshuari vdiq nga lëndimet e shkaktuara vetë. Dy persona u gjetën më vonë të vdekur në një shtëpi. Policia dyshon për një lidhje të mundshme me incidentin në shkollë.

Kryeministri Carney dënon sulmin

Kryeministri kanadez Mark Carney tha se ishte “thellësisht i tronditur” nga sulmi dhe shprehu ngushëllimet e tij për viktimat dhe familjet e tyre.

“Lutjet dhe ngushëllimet e mia më të thella shkojnë për familjet dhe miqtë që kanë humbur të dashurit në këto sulme të tmerrshme të dhunshme”, shkroi ai në X

Kryeministri kanadez ka anuluar gjithashtu, të paktën përkohësisht, vizitën e tij të planifikuar në Konferencën e Sigurisë së Mynihut (MSC). Zyra e tij i tha agjencisë së lajmeve AFO se Carney nuk do të udhëtojë “për momentin” për shkak të incidentit. Carney kishte planifikuar të ishte në Mynih nga e mërkura deri të dielën.

Motivi ende i panjohur

Të shtënat ndodhën të martën rreth orës 13:20 sipas orës lokale në qytetin Tumbler Ridge, në shkollën e mesme me të njëjtin emër. Kur mbërritën, njësitë e policisë gjetën gjashtë viktima dhe trupin e të dyshuarit. Dy persona në gjendje kritike u dërguan në spital me helikopter; njëri prej tyre vdiq gjatë fluturimit. Sipas policisë, motivi i sulmit është ende i panjohur.

Policia u kishte bërë thirrje banorëve të zonës të mbyllnin dyert e tyre dhe të mos dilnin nga shtëpitë ose bizneset e tyre deri në njoftim të mëtejshëm.

Tumbler Ridge ndodhet rreth 700 kilometra në verilindje të Vankuverit. Sipas të dhënave të saj, komuna ka rreth 2,700 banorë.