Sunny Hill nuk sjell vetëm yje botërorë në Prishtinë, por krijon edhe yjet e së ardhmes
Përveç muzikës dhe emrave të mëdhenj që vijnë në Prishtinë në Festivalin Sunny Hill, Fondacioni me të njëjtin emër, i këngëtars Dua Lipa financon bursa për vajza të reja, krijon mundësi për autorë këngësh në Suedi dhe mbështet arsimin artistik në Kosovë. Këtë vit, festivali do të mbahet nga 31 korriku deri më 2 gusht, raporton Portalb.mk.
Trashëgimia e Sunny Hill Festival nuk janë vetëm yjet botërore që ngjiten në skenë, por ndikimi që të ardhurat e festivalit krijojnë gjatë pjesës tjetër të vitit. Festivali funksionon në shërbim të Sunny Hill Foundation, i themeluar në vitin 2018 nën patronazhin e Dua Lipës, me synimin për të investuar në talentet e reja krijuese të Kosovës.
Deri tani janë financuar 30 bursa për vajza të reja nga e gjithë Kosova për arsim cilësor, janë mbështetur 17 organizata kulturore dhe organizata joqeveritare, ndërsa u themelua me një donacion prej 100 mijë eurosh për bamirësi në Kosovë. Misioni i tij është të zgjerojë qasjen në art për një brez që rrallëherë ka pasur mundësi të tilla.
Programi më i veçantë i fondacionit është bashkëpunimi me Suedinë. Përmes një partneriteti shumëvjeçar me Musikmakarna, akademinë e parë suedeze për shkrimin e këngëve, fondacioni organizon Songwriting Camp, i cili u mundëson autorëve dhe producentëve të rinj kosovarë të krijojnë muzikë së bashku me kolegë ndërkombëtarë. Ky rrjet bashkëpunimi lidhet edhe me Tim Bergling Foundation, i themeluar në kujtim të artistit Avicii. Përveç kësaj, fondacioni ka dërguar artistë të rinj kosovarë për masterklasa në Institute of Arts and Innovation në Los Anxhelos.
Në partneritet me Komunën e Prishtinës, fondacioni po zhvillon një qendër të madhe rajonale për muzikë dhe art, ndërsa fushata të festivalit, si “A Flag for Her“, e kanë shfrytëzuar skenën kryesore për të ngritur zërin kundër dhunës me bazë gjinore.
“Festivali është motori, por fondacioni është arsyeja e ekzistencës së tij,” tha bashkëthemeluesi i festivalit, Dukagjin Lipa.
“Çdo biletë ndihmon që një i ri nga Kosova të gjendet në të njëjtën dhomë me profesionistët më të mirë në botë. Ne u rritëm pa e pasur atë mundësi, tani po sigurohemi që brezi i ardhshëm të mos e ketë të njëjtin kufizim.”
Biletat për tri ditë janë në shitje në www.sunnyhillfestival.com.
Sunny Hill Festival është festivali më i madh muzikor në Kosovë dhe një nga festivalet kryesore të muzikës në Evropën Juglindore. I themeluar nga familja Lipa, festivali është përzgjedhur tri herë në listën e 10 festivaleve më të mira evropiane të kategorisë së mesme. Gjatë viteve, ai e ka vendosur Prishtinën në hartën ndërkombëtare të festivaleve si një destinacion kulturor që duhet vizituar, në një vend që e do muzikën dhe di të festojë.
Si një festival ndërkombëtar që organizohet sipas standardeve më të larta, Sunny Hill mbledh në çdo edicion mbi 100 mijë adhurues të muzikës nga e gjithë bota, për të përjetuar performanca të paharrueshme, energji unike dhe një komunitet të gjallë.
Në edicionet e kaluara kanë performuar artistë si Dua Lipa, Miley Cyrus, Calvin Harris, Shawn Mendes, J Balvin, Anyma, Stormzy, Peggy Gou, Mochakk, Black Coffee, Burna Boy, Fatboy Slim, Martin Garrix, Hardwell dhe shumë të tjerë.
Shtëpia e përhershme e festivalit, Sunny Hill Festival Park në Bërnicë, përfshin katër skena: Main Stage, C4 Stage, Satellite Stage dhe Tent Stage.
- LEXO: Sunny Hill Festival rikthehet në Prishtinë, Kosova në hartën botërore të muzikës
- LEXO: Sunny Hill Festival rikthehet në Prishtinë, Kosova në hartën botërore të muzikës
