RMV, Antikorrupsioni ka filluar procedurë për kontroll të ligjit për veprimtari hotelierike dhe tre ligjeve të tjera

By N. D. On 24/03/2025 12:51

Komisioni për Parandalimin e Korrupsionit (Antikorrupsioni). Foto: Portalb.mk

Komisioni Shtetëror për Parandalimin e Korrupsionit ka nisur një kontroll “antikorrupsion” të ligjeve, me qëllim që të mundësojë zbulimin dhe parandalimin e rreziqeve të mundshme të korrupsionit gjatë zbatimit të procedurave të duhura në lidhje me dhënien e miratimeve dhe licencave të punës, lejeve të punës së objekteve hotelierike, si dhe në pjesën e mbikëqyrjes së tyre, transmeton Portalb.mk.

KSHPK më saktësisht do të kontrollojë zgjidhjet e mëposhtme ligjore:

– Ligji për veprimtarinë hotelierike
– Ligji për mbrojtje dhe shpëtim
– Ligji për mbikëqyrje inspektuese
– Ligji për vetëqeverisje lokale
– ligje të tjera materiale

Kontrolli antikorruptiv i ligjeve si proces, thonë nga KSHPK, nënkupton vlerësim të plotë dhe sistematik të rregulloreve ligjore për të identifikuar mundësitë për abuzime, konflikte interesi, paqartësi dhe zbrazëtira në ligje që mund të nxisin praktikat korruptive. Njëkohësisht do të bëhet një analizë dhe vlerësim i plotë i formës dhe përmbajtjes së rregulloreve (ligjeve, akteve nënligjore dhe akteve të tjera të përgjithshme) që janë duke u përgatitur ose që tashmë janë përgatitur për zbatimin praktik, përputhshmërinë dhe përmirësimin e tyre, me qëllim zbulimin, parandalimin dhe minimizimin e rreziqeve në lidhje me mundësinë e korrupsionit dhe konfliktit të interesit që mund të rezultojë në zbatimin e ligjeve.

“Si rezultat kryesor i inspektimit antikorrupsion, presim të forcohet qasja parandaluese dhe në vend që të reagojmë ndaj praktikave korruptive post-faktum, të kemi proaktivitet, i cili do të mundësojë ligjet të jenë të lira nga rreziqet e korrupsionit. Nëpërmjet procedurës do të bëhet një vlerësim i rreziqeve dhe do të analizohen dispozita specifike që mund të krijojnë kushte për favorizim, vendimmarrje diskrecionale ose mungesë transparence”, thuhet në njoftimin e KSHPK-së.

KSHPK do të përfshijë shumë aktorë përmes bashkëpunimit me institucionet përkatëse dhe shoqërinë civile, të cilat do të sigurojnë pavarësi dhe objektivitet në analizë.

Të gjitha rezultatet, thotë Antikorrupsioni, do të jenë publike dhe i gjithë procesi do të jetë transparent dhe publik, dhe raportet dhe rekomandimet do t’i dërgohen Qeverisë dhe Kuvendit, me qëllim përmirësimin e këtyre ligjeve dhe në këtë mënyrë të ndikojë dhe të mos lërë hapësirë për aktivitete korruptive.

“Theksojmë se KSHPK-ja, si institucion përgjegjës për rishikimin e legjislacionit kundër korrupsionit, kryesisht për ligjet në fazën e hartimit, duhet të jetë në kontakt të vazhdueshëm me ministritë kompetente që paraqesin propozime për miratimin e ligjeve dhe të përgatisin projektligje dhe propozime legjislative për të cilat Qeveria e Republikës së Maqedonisë së Veriut është propozues i autorizuar, si dhe të informohet në kohë në rast të iniciativave të mundshme për hartimin e legjislacionit të ri ose për ndryshime në ligje ekzistuese nga një hartues tjetër i autorizuar ligjesh”, thuhet në njoftim.

Këto kontrolle vijnë si rezultat i zjarrit të rënë në diskotekën “Pulse” më 16 mars 2025, ku jetën e humbën 59 persona, midis të cilëve 6 të mitur, u lënduan 196 persona të cilët trajtohen brenda dhe jashtë vendit.

Sipas hetimeve të deritanishme nga institucionet, diskoteka nuk kishte rrjet hidranti dhe mjaftueshëm aparate PP, përdoreshin materiale piroteknike në mënyrë të paligjshme, nuk kishte as leje pune të ligjshme dhe nuk ishte lidhur asnjë kontratë me shkrim mes organizatorit dhe grupit interpretues.

Prokuroria në Koçan dhe Prokuroria për Ndjekjen e Krimit të Organizuar dhe Korrupsionit kanë identifikuar si të dyshuar gjithsej 34 persona dhe tre kompani për krime të rënda kundër sigurisë publike. Ndërkaq, Ministria e Punëve të Brendshme ka ngritur kallëzime penale kundër tyre, në mesin e tyre ka ish-funksionarë shtetërorë. Në paraburgim janë 24 persona.

Komisioni për Antikorrupsion RMV Zjarri në diskotekën në Koçan