Punonjësve të Qeverisë suedeze iu ndalua përdorimi i ChatGPT dhe Claude në punë: Ja pse
Punonjësit e Qeverisë suedeze nuk do të mund t’i përdorin më versionet online të ChatGPT dhe Claude në kompjuterët zyrtarë, për shkak të rreziqeve që lidhen me sigurinë dhe përpunimin e të dhënave të ndjeshme. Ndalimi hyri në fuqi të hënën, ndërsa vendimi vjen pas një analize të mënyrës se si punonjësit e Administratës Suedeze të Transportit i kishin përdorur mjetet e inteligjencës artificiale, raporton Euronews.
Analiza tregoi se këto platforma, në raste të caktuara, ishin përdorur në mënyrë “problematike” gjatë kryerjes së detyrave zyrtare.
Shqetësimi kryesor i autoriteteve suedeze është mundësia që punonjësit të fusin informacione të ndjeshme ose zyrtare në platformat e inteligjencës artificiale, për të cilat nuk ka marrëveshje përkatëse që rregullon mbrojtjen dhe sigurinë e të dhënave.
Sipas autoriteteve, kjo krijon rrezikun që informacionet të ruhen ose të përdoren për trajnimin e mëtejshëm të modeleve të inteligjencës artificiale.
Përdorimi i mjeteve informatike të paautorizuara, praktikë e njohur si “shadow IT”, mund të ketë pasoja për sigurinë e informacionit, paralajmëroi Mikael Wetterkrantz, drejtor për digjitalizim në Zyrën e Qeverisë suedeze.
Si alternativë, punonjësve u rekomandohet Microsoft Copilot. Ky mjet i është nënshtruar një kontrolli të sigurisë dhe mbulohet nga një marrëveshje për mbrojtjen e të dhënave ndërmjet Microsoft-it dhe Qeverisë suedeze.
Megjithatë, ndalimi nuk nënkupton se nëpunësit shtetërorë do të ndërpresin plotësisht përdorimin e inteligjencës artificiale.
Inteligjenca artificiale do të mund të vazhdojë të përdoret si ndihmë në punë, por nën rregulla më të rrepta sigurie. Një numër i kufizuar punonjësish do të mund të vazhdojnë të përdorin ChatGPT dhe Claude, por vetëm përmes një platforme të posaçme për asistentë të inteligjencës artificiale, të zhvilluar nga autoritetet suedeze, shkruan Euronews.
Kufizime të ngjashme për ChatGPT dhe Claude janë vendosur tashmë edhe në Administratën Tatimore Suedeze dhe në Bordin Kombëtar për Kujdesin Institucional, ndërsa Agjencia Suedeze e Përmbarimit po shqyrton mundësinë e zbatimit të masave të ngjashme.
Kështu, ChatGPT dhe Claude i bashkohen platformës kineze DeepSeek në listën e mjeteve të inteligjencës artificiale që nuk janë miratuar për përdorim të drejtpërdrejtë në disa pjesë të administratës shtetërore suedeze, për shkak të shqetësimeve lidhur me sigurinë e të dhënave.