Protestë para Qeverisë dhe Ministrisë së Drejtësisë për rastin me Klinikën për onkologji

By F. C. On 25/09/2023 21:57

Klinika universitare për radioterapi dhe onkologji. Foto: Fisnik Xhelili/Portalb.mk

Me porosi “Drejtësi për viktimat” edhe sonte para Qeverisë u mbajt protestë për rastin me Klinikën për onkologji, e cila përfundoi para Ministrisë së Drejtësisë. Organizatorët e protestës theksuan se nuk është përmbushur ultimatumi nga java e kaluar, respektivisht Prokuroria publike nuk i ka publikuar të gjitha hollësirat për vijimin e hetimit për skandalin në Onkologji, raporton MIA.

Organizatorët paralajmëruan se do të vazhdojnë të protestojnë para ndërtesës qeveritare çdo të hënë në ora 18 dhe bënë me dije se nëse institucionet kompetente nuk ndërmarrin asgjë, nëse nuk ka kurrfarë epilogu për këtë rast deri 1 nëntor, atëherë do të kërkojnë presion nga bashkësia ndërkombëtare që të gjitha hollësirat rreth ngjarjeve në Onkologji të bëhen publike.

Protestuesit sonte kanë parashtruar gjashtë ultimatume të reja: Hetim për involvimin e ish ministrit të Shëndetësisë, Venko Filipçe dhe ish drejtorit të Onkologjisë, Nino Vasev; Zgjerimin e hetimit në punën e Onkologjisë për fëmijë; Revizion i plotë në punën e Klinikës për onkologji; Aktgjykime të plotëfuqishme gjyqësore për të gjithë të involvuarit në krimin në Onkologji; Publikimin e informatave nga hetimi për tragjedinë në spitalin modular në Tetovë dhe Përgjegjësi nga PP, e cila ka vendosur se nuk ka vepra penale në rastin tragjik me Janën e vogël nga Manastiri.

Përveç për ngjarjet në Onkologji, qytetarët reaguan edhe për ngjarjet tjera, siç janë ndryshimet e Kodit penal, për zjarrin në spitalin modular në Tetovë, për Janën e vogël nga Manastiri dhe për fatkeqësinë tragjike të autobusit në Bullgari.

Ndryshe, Prokuroria publike të premten ka ngritur akuzë për “mashtrim” kundër infermieres nga Klinika për onkologji, e cila ka vjedhur citostate. E dyshuara nuk është e kapshme për organet e rendit.

“Prokuroria Publike kundër saj ka ngritur dy aktakuza për vepra penale – “mashtrim” në shërbim nga neni 354 nga Kodi penal. Gjatë procedurës së mëparshme, Prokuroria ka ofruar prova se e akuzuara, me qëllim të përfitimit të paligjshëm për vete, ka përvetësuar një numër të madh të ampulave me qëllime të ndryshme në vlerë të përgjithshme prej 59.760 denarëve që i janë besuar në shërbim. Ampulat i ka nxjerrë nga vendi i punës, e më pas i ka lënë në veturë me qëllim që t’ia dorëzojë një personi tjetër”, sqarojnë nga Prokuroria për MIA-n.

Drejtoresha mjekësore e Klinikës universitare për onkologji dhe radioterapi, Violeta Klisarovska në fillim të këtij muaji informoi se infermierja është kapur në tentim të përsëritur për vjedhje dhe se është larguar nga puna. Në pyetjen e gazetarëve se çfarë kompetencash kishte e pushuara nga puna, drejtoresha u përgjigj se ajo ishte infermiere në spitalin ditor dhe nuk ka qenë e lidhur drejtpërdrejtë me përgatitjen e ilaçeve.

Më 1 shtator 2023, në bazë të urdhrit gjyqësor, sipas drejtimeve të prokurorit publik nga Prokuroria Themelore Publike Shkup, pjesëtarë të MPB-së kanë kryer bastisje në Klinikën e Onkologjisë, si dhe në dy lokacione tjera në banesa private në Shkup. Janë marrë disa kompjuterë, të dhëna kompjuterike dhe tjetër dokumentacion, të cilët do të jenë lëndë e analizës dhe ekspertizës. Ky aksion erdhi pas publikimit të informacioneve në media se, se punonjësit e Klinikës së Onkologjisë në mënyrë të paligjshme u shesin barna pacientëve.

Ky rast nxiti reagime të shumta.

Ministria e Shëndetësisë do të bashkëpunojë ngushtë me autoritetet hetimore për zbardhjen e rastit të keqpërdorimit të terapisë për pacientët e Klinikës Onkologjike, kështu ka thënë për këtë rast ministri i Shëndetësisë, Fatmir Mexhiti. Sipas tij, është e nevojshme të kryhet hetim i plotë dhe i paanshëm.

Apel për zbardhjen sa më të shpejtë të rastit të manipulimit të barnave kërkoi edhe ushtruesja e detyrës Violeta Klisarovska, drejtore e Klinikës së Onkologjisë, e cili theksoi se si ekip organizativ ishin plotësisht në dispozicion të organeve hetimore.

Edhe Prokuroria bëri thirrje që të gjithë ata që kanë informacion në lidhje me këtë çështje t’i raportojnë organeve kompetente.

Presidenti i vendit Stevo Pendarovski, tha se ka ardhur koha që të t’i jepet fund kulturës së mosndëshkimit, pasi kjo situatë ka vënë në pikëpyetje cilësinë e trajtimit të pacientëve.

Kryeministri Dimitar Kovaçevski dje e përshëndeti aksionin e MPB-së dhe të prokurorisë, megjithatë ai bëri thirrje që të mos bëhet sensacionalizëm dhe të mos sulmohen të gjithë mjekët dhe infermieret, për shkak të disave.

Reaguan edhe dy partitë më të mëdha maqedonase.

Nga LSDM kanë shprehur mbështetje për institucionet për zbardhjen e tërësishme të rastit, duke porositur se, askush nuk do të pasurohet në llogari në shëdetit.

Ndërkaq, nga VMRO – DPMNE-ja opozitare kanë akuzuar se, biznesi me barna në Onkologji është mundësuar vetëm me dijeninë e strukturave të lartë në klinikë dhe në pushtet.

Reagime pati edhe nga partitë shqiptare.

Lëvizja Besa kërkoi që përgjegjësit e këtyre akteve barbare e monstruoze të marrin dënimin maksimal me burg, ndërkaq nga ministri aktual i Shëndetësisë kërkuan të dëshmojë se nuk e ka prioritet pozitën, por qytetarin, këtë duke vendosur në shprehje aktin moral të dorëheqjes.

Bashkimi Demokratik për Integrim kërkoi që institucionet kompetente, në veçanti prokuroria, urgjentisht dhe detajisht të hetojnë të gjitha pretendimet për keqpërdorime të rënda mbi jetën dhe shëndetin e pacientëve.

Nga Aleanca për Shqiptarët, Arben Taravari shkroi se për skandalin në Klinikën e onkologjisë, Aleanca për Shqiptarët ka alarmuar qysh në dhjetor të 2022. Por, askush nuk reagoi dhe u llogarit si një reagim koti.

Lëvizja Demokratike theksoi s në shtete normale për raste të këtilla si skandali i onkologjisë, dorëhiqen qeveritë. Sipas tyre, aksioni policor në Klinikën e Onkologjisë, sipas të gjithë treguesve, në sipërfaqe do të nxjerrë një skandal me përmasa tragjike

Alternativa bëri thirrje që ky rast të mos përfundojë nga Prokuroria Publike njësoj si cinizmi i saj me spitalin modular në Tetovë, ndërsa kërkon mbështetje dhe mbikëqyrje nga ndërkombëtarët që ta vëzhgojnë këtë lëndë.

Ministri i Punëve të Brendshme, Oliver Spasovski, në një prononcim për emisionin “Click Plus” në Tv 21 e cilësoi rastin si “krim”.