Procesi Brdo-Brioni, prioriteti numër një për vendet e Ballkanit Perëndimor janë aspiratat evropiane
Presidenti Stevo Pendarovski sot në Shkup prit në takim liderët e vendeve pjesëmarrëse në Procesin Brdo-Brioni, së bashku me presidentët e Republikës së Kroacisë dhe Republikës së Sllovenisë, Zoran Milanoviq dhe Natasha Pirc Musar. Tema e parë e takimit të sotëm ishte prioriteti numër një për vendet e Ballkanit Perëndimor, që janë aspiratat evropiane. transmeton Portalb.mk.
“Dëshira për anëtarësim në Bashkimin Evropian, pa përjashtim, e pranishme në të gjitha vendet që janë pjesë e këtij forumi, është një faktor domethënës që na motivon dhe na lidh. Në këtë kontekst, është e qartë për të gjithë ne se duhet të arrijmë standardet evropiane të qeverisjes së mirë dhe një ekonomi tregu funksionale”, deklaroi Pendarovski.
Stabiliteti dhe prosperiteti në rajon janë të ndërvarur, prandaj, shtoi Pendarovski, është më se e nevojshme të flasim hapur për çështjet më të vështira, të kërkojmë zgjidhje të qëndrueshme dhe të mbyllim çështjet e hapura. Gjithashtu, me përpjekje të përbashkëta, tha ai, ne duhet të sigurojmë që Ballkani Perëndimor të kthehet plotësisht në axhendën evropiane dhe të qëndrojë atje.
“Nuk ka dyshim se e ardhmja, jo vetëm e rajonit tonë, por edhe e botës, do të përcaktohet nga sfida më e madhe globale, që janë ndryshimet klimatike. Zjarret dhe përmbytjet e pyjeve të këtij viti në rajon dhe në Evropë janë tregues se çfarë lloj të ardhmeje na pret. Kushtet ekstreme të motit do të jenë më intensive dhe valët e të nxehtit, thatësirat dhe zjarret, stuhitë dhe përmbytjet do të bëhen më të shpeshta. Prandaj, politikat që lidhen me ndryshimet klimatike, potenciali i të cilave tejkalon kapacitetet e secilit vend individual, u shfaqën si një temë e rëndësishme në këtë takim. Në këtë kuptim, ne të gjithë jemi dakord se duhet të forcojmë përpjekjet tona në këtë garë globale kundër kohës, duke sjellë zgjidhje që do të zbusin pasojat negative të ndryshimeve klimatike dhe do të përfshijnë solidaritetin social, politik dhe rajonal”, deklaroi Pendarovski.
Në takim, siç njoftojnë nga presidenca, u bisedua edhe për sfidën më të madhe për rajonin – emigracionin e të rinjve. Konkluzioni i përbashkët i të gjithë të pranishmëve ishte se nëse nuk i rezistojmë këtij trendi dhe nëse nuk ngadalësohet me politika specifike, na pret një e ardhme shumë më e keqe nga ajo që mund të parashikojmë aktualisht. Mesazhi ynë i përbashkët është të dyfishojmë përpjekjet dypalëshe dhe rajonale për të krijuar perspektiva që të rinjtë të qëndrojnë në rajon dhe të realizohen në vendet e tyre.
Në takimin e sotëm u arrit që të harmonizohet teksti dhe të miratohet Deklarata nga Shkupi, e cila përmban gjetjet dhe zotimet e përbashkëta të të nëntë presidentëve lidhur me temat që ishin temë e diskutimit të sotëm.
Procesi Brdo-Brione është një ngjarje shumëpalëshe vjetore në Ballkanin Perëndimor . Ai u iniciua në vitin 2013 nga presidenti slloven Borut Pahor dhe presidenti kroat Ivo Josipoviq . Takimi i parë zyrtar ishte në Brdo pri Kranju, Slloveni. Fokusi kryesor i Procesit është zgjerimi i Bashkimit Evropian me vendet e Ballkanit Perëndimor. Procesi Brdo-Brioni përfshin Slloveninë dhe Kroacinë ( Shtetet Anëtare të BE-së ) dhe kandidatët dhe kandidatët e mundshëm për anëtarësim në BE nga Ballkani Perëndimor ( Serbia, Mali i Zi, Shqipëria, Maqedonia e Veriut, Bosnja dhe Hercegovina dhe Kosova ).
Në vitin 2014, Procesi i Berlinit u iniciua nga kancelarja gjermane Angela Merkel, në të cilin përfshihen të gjitha vendet e Procesit Brdo-Brioni.
Ndryshe, Policia e Maqedonisë së Veriut ka paralajmëruar që sot do të ketë kufizime në komunikacionin e Shkupit për shkak vizitave nga zyrtarë nga vendet e ndryshme.