Opozitari Nikolla Sandulloviq i paralizuar pjesërisht pas sulmit nga Shërbimi sekret serbe
Familja e liderit të opozitës Nikola Sandulloviq, i cili dyshohet se u rrah nga shërbimi sekret serb ndërsa ishte në paraburgim, thotë se ai është pjesërisht i paralizuar nga sulmi, i cili ndodhi pasi kërkoi falje për krimet e kryera nga serbët kundër shqiptarëve etnikë në Kosovë, raporton Guardian.
Sulmi ndaj opozitarit Nikola Sandulloviq ndodhi më 3 janar, kur ai u mor nga shtëpia e tij nga anëtarët e shërbimit sekret serb. Një epilog i tillë vjen pasi ai kërkoi falje për krimet serbe të kryera në Kosovë.
Familjes së Sandulloviqit iu lejua ta vizitonte atë në spital vetëm pesë ditë pas rrëmbimit të tij. Vajza e Sanduloviq-it bëri thirrje që babai i saj të transferohej në një spital civil nga objekti ushtarak në Beograd ku po mbahej.
“Ai është komunikativ, por është plotësisht i paralizuar në anën e djathtë, në një karrocë me rrota dhe me shëndet shumë, shumë të dobët,” tha vajza e Sanduloviqit në një deklaratë të lëshuar përmes Michael Pollack, një avokat në Mbretërinë e Bashkuar që vepron për politikanin.
Familja beson se Sanduloviqi, lideri i Partisë Republikane Serbe dhe një kritik i rregullt i Partisë Progresive Serbe (SNS) në pushtet të Aleksandar Vuçiqit, mund të jetë “helmuar”, shtoi ajo. Avokatët thanë se nuk mund të konfirmonin asgjë në lidhje me shëndetin e Nikola Sandulloviqit ose sulmin derisa ai u dërgua në një strukturë civile me akses të plotë tek mjekët dhe avokatët.
Pollack paraqiti një rast urgjent në Komitetin e Kombeve të Bashkuara Kundër Torturës dhe kërkoi zyrtarisht akses në një spital civil. Ai thotë se Sanduloviq u kap nga shërbimi inteligjent serb, pastaj u arrestua dhe u torturua në mënyrë arbitrare.
The Guardian ka kërkuar koment edhe nga qeveria serbe për këtë rast.
Sanduloviq u kritikua ashpër në mediat shtetërore serbe pasi ai publikoi një video vitin e kaluar në të cilën ai vizitoi varrin e Adem Jasharit, themeluesit të Ushtrisë Çlirimtare të Kosovës, i cili u vra nga policia serbe në vitin 1998 së bashku me 57 anëtarë të familjes së tij gjatë luftës në Kosovë.
Në momentin e gjestit fillestar, në shkurt të vitit 2023, Sanduloviq kërkoi falje për vdekjen e Jasharit dhe familjes së tij. Ai e ripublikoi videon së bashku me një tjetër falje në dy javët e fundit, duke shkaktuar kritika nga disa media serbe.
“Unë jam i vetmi politikan nga Serbia që kam ardhur për të nderuar viktimat e pafajshme shqiptare, familjen Jashari, në Prekaz. Kërkova falje në emër të serbëve që nuk e bënë këtë”, ka shkruar Sanduloviq në rrjetin social X më 2 janar.
Komentet e tij besohet të jenë arsyeja e sulmit ndaj tij.
“Ai është rrahur keq. Ai ka një brinjë të thyer. Kur e sollën në shtëpi, ai hyri brenda dhe humbi ndjenjat dhe u ankua se nuk mund të lëvizte anën e djathtë të trupit”, thotë avokati Pollack.
Pavarësisht kësaj, Sanduloviq u arrestua një ditë pasi policia serbe e ktheu në shtëpinë e tij dhe familja e tij nuk e pa deri në mëngjesin e së mërkurës.
Gjyqtari e la atë në paraburgim për 30 ditë pasi ai u akuzua, në mungesë, për gjoja nxitje të urrejtjes kombëtare, racore dhe fetare, vepër kjo sipas nenit 317 të Kodit të Sjelljes Penale të Serbisë që parashikon një dënim me burg nga gjashtë muaj deri në pesë vjet.
Pollak thotë se akuza është një shkelje e qartë e Konventës Evropiane për të Drejtat e Njeriut për mbrojtjen e fjalës politike.
Sulmi do të ngrejë pyetje të reja në lidhje me synimin e Serbisë për t’u bashkuar me BE-në dhe do të nxisë frikën për marrëdhëniet e saj me vendet fqinje, përfshirë Kosovën. Sulmi ndaj Sanduloviq vjen mes akuzave se zgjedhjet e fundit ishin manipuluar në favor të SNS të presidentit Aleksandër Vuçiç, një akuzë që Vuçiç e mohon.
Në një deklaratë për sulmin e Sanduloviç të mërkurën, Komisioni Evropian njoftoi se është “në kontakt me autoritetet përkatëse dhe palët e interesuara”. BE thotë se çdo ndalim duhet të justifikohet ligjërisht dhe “çdo pretendim i besueshëm për dhunë duhet të ndiqet efektivisht nga autoritetet kompetente përkatëse”.