Nxënësit nga Trubareva do të mësojnë një javë online për shkak të ajrit të ndotur nga zjarri

By N. D. On 14/09/2025 14:33

Orë mësimore në hapësirat e shkollës. Foto nga Faton Curri / Portalb.mk.

Nxënësit nga shkollat në afërsi të zjarrit në Trubarevë të Shkupit do të mësojnë online për një javë, tha sot Ministri i Shëndetësisë Azir Aliu. Katër persona u lënduan në zjarrin e djeshëm në qendrën e riciklimit të “F-Grupacija” në Trubarevë të Shkupit, për mbeturina të pajisjeve elektrike dhe elektronike dhe mbeturina të baterive dhe akumulatorëve, bateri litium-jon nga pajisjet dhe automjetet, si dhe të gjitha llojet e mbeturinave elektronike. Aliu tha se një banore e Trubarevës, e cila jeton në afërsi të zjarrit, është shtruar në spital në Klinikën e Toksikologjisë, dhe ajo kishte marramendje dhe kollë, transmeton Portalb.mk.

Një polic, një pjesëtar i ARM-së dhe drejtori i Qendrës për Menaxhimin e Krizave (QMK) u lënduan gjithashtu, por u liruan për trajtim në shtëpi. Të katër personat janë jashtë rrezikut. QMK njoftoi se drejtori Muhamed Ali kërkoi ndihmë mjekësore nga Toksikologjia mbrëmë sepse kaloi më shumë se 12 orë në terren duke shuar zjarrin dje dhe në orët e mbrëmjes dhe ishte i ekspozuar ndaj ajrit të ndotur për një kohë të gjatë. Pas kontrolleve mjekësore, gjendja e tij shëndetësore është e qëndrueshme dhe nuk përbën rrezik.

Asnjë banor nga Trubareva nuk është evakuuar vullnetarisht në Qendrën e Trajnimit të Ministrisë së Brendshme në Idrizovë, e cila u la për të akomoduar banorët, shtëpitë e të cilëve janë afër vendit të zjarrit.

Edhe Ministria e Arsimit dhe Shkencës informoi se mësimi në shkollat fillore “Krum Toshev”, “Njegosh”, “Vera Jocic” dhe “Naum Naumovski Borce” në komunën e Gazi Babës, nga e hëna, 15 shtator deri të premten, 19 shtator, do të zhvillohet pa prani fizike të nxënësve në shkolla, përkatësisht online.

“Për shkak të zjarrit në Trubarevë, komuna e Gazi Babës dhe rekomandimeve të Inspektoratit Shtetëror të Mjedisit, në një seancë urgjente të Qeverisë u miratua një Përfundim që mësimi në katër shkollat fillore të zhvillohet përmes mësimit në distancë, duke përdorur mjete komunikimi elektronik. Ministria e Arsimit dhe Shkencës i informoi shkollat që të organizojnë mësimin në përputhje me kushtet e krijuara rishtazi”, thonë nga MASH.

Mbetjet e rrezikshme digjen në qendrën e riciklimit që dje, ndërsa zjarri shpërtheu dje rreth orës 13:30 në lokacion të destinuar për ruajtjen e materialeve të mbeturinave elektrike. Zjarri shpejt shkaktoi tym të zi të dendur dhe u përhap në disa ndërtesa përreth. Zjarri u vu nën kontroll të plotë këtë mëngjes pas 15 orësh.

Drejtoresha e Institutit të Shëndetit Publik (ISHP), Marija Andonovska, tha se ata nuk kryejnë analiza fizike dhe kimike të ajrit, monitorimin e bën një institucion tjetër shtetëror.

“Ne jemi të detyruar ligjërisht të monitorojmë cilësinë e ajrit, tokës dhe ujit, si dhe rrezatimin në ajër, dhe mund të them se Instituti ka pajisjet më moderne për këtë qëllim dhe profesionistë. Kemi 12 stacione matëse në të gjithë vendin, disa prej të cilave janë në Shkup, të cilat na tregojnë në kohë reale nëse ka devijime në parametrat e radioaktivitetit në ajër. Sipas njohurive tona, për momentin nuk ka asnjë, madje as një devijim minimal nga parametrat normalë, kur bëhet fjalë për radioaktivitetin në ajër. Sot dhe nesër, ekipet tona do të kryejnë analiza, do të kontrollojnë si tokën ashtu edhe ujin”, tha Andonovska.

Ministri i Mjedisit dhe zëvendëskryeministri i parë Izet Mexhiti tha se sot do të ketë rezultate mbi cilësinë e ajrit dhe “gjithçka do të raportohet në detaje dhe në mënyrë transparente”.

Drejtori i Drejtorisë për Mbrojtje dhe Shpëtim (DMSH) Stojançe Angelov tha se zjarri u parandalua të përhapet në impiantet ku ruhej plastika e mbeturinave. Ai tha se zjarrfikësit zbuluan se ku digjeshin bateritë e litiumit bazuar në shpërthimet dhe vepruan atje me rërë, dhe mbi mbetjet e tjera që digjeshin me ujë dhe shkumë.

Ministria e Mjedisit njoftoi se në bashkëpunim me Institutin e Shëndetit Publik, Shtabin Qeveritar të Krizave dhe Inspektoratin Shtetëror të Mjedisit, janë marrë masa urgjente për të mbrojtur shëndetin e qytetarëve.

“Në përputhje me rekomandimet e Inspektoratit Shtetëror të Mjedisit, po ndërmerren aktivitetet e mëposhtme: Kërkesë nga Instituti për Shëndet Publik të bëhen analiza të ujit nga puset që i përdorin amvisëritë në afërsi të lokacionit të djegur. Ndalim i qasjes dhe lëvizjes në zonën e djegur për të parandaluar rreziqe të mëtejshme për shëndetin dhe sigurinë. Gjatë 7 ditëve të ardhshme, një laborator i akredituar do të kryejë monitorim të vazhdueshëm 24/7 për cilësinë e ajrit ambienal në rajon. Është dhënë rekomandim deri te Shkolla Fillore Komunale “Krum Toshev” në Trubarevë që të kufizojë lëvizjen e nxënësve në hapësirat e jashtme të shkollës deri në normalizimin e situatës”, njoftoi Ministria.

Zjarri në Trubarevë është shuar, nuk ka djegie aktive, por ka tym të dendur që depërton nëpër tokë dhe rërë nga zonat e mbuluara. Mbetet të mbushet një pjesë e zonës së djegur, tha këtë mëngjes drejtori i Drejtorisë për Mbrojtje dhe Shpëtim (DMSH) Stojançe Angellov.

Zjarri në Trubarevë shpërtheu dje në objektin e firmës “F-Grupacioni” e cila merret me mbeturina elektronike, janë përfshirë edhe dy objekte në të cilët ka pasur sasi e madhe e mbeturinave plastike. Nuk ka të lënduar në zjarr, deklaroi drejtori i Drejtorisë për Mbrojtje dhe Shpëtim (DMSH) Stojançe Angellov. Ai shtoi se nga perceptimi në terren, bëhet fjalë për vënie të qëllimshme të zjarrit.

Ndryshe, kohëve të fundit, janë raportuar zjarre edhe në shumë deponi, si në Drislla, ajo pranë fshatit Kuklish në komunën e Strumicës, deponia Dellçevë, deponia e qytetit në Komunën e Krushevës, si dhe deponia Vardarishtë në Komunën Gazi Babë. E gjithë kjo kulmoi me zjarrin në Trubarevë.

Mjekët në vend paralajmërojnë se pasojat në shëndetin e njeriut nga toksinat që shkaktohen nga djegia ose tymi i deponive janë të mëdha. Kjo situatë mund të shkaktojë sëmundje të mushkërive dhe zemrës, si dhe anemi.