Moneyval: RMV me përparim në parandalimin e pastrimit të parave, por nevojiten reforma të mëtejshme

Maqedonia ka bërë përparim në forcimin e kuadrit të saj ligjor dhe institucional për parandalimin e pastrimit të parave dhe financimit të terrorizmit, por nevojiten përpjekje të mëtejshme për të adresuar dobësitë e mbetura. Kjo thuhet në një raport të ri nga organi i Këshillit të Evropës kundër pastrimit të parave – MONEYVAL, i publikuar më 25 qershor 2025 në Strasburg, transmeton Portalb.mk.

Raporti thekson se janë arritur përmirësime në tre nga rekomandimet e Task Forcës së Veprimit Financiar (FATF), përkatësisht në fushat e transaksioneve të transfertave bankare, kontrollit të brendshëm dhe mbikëqyrjes së degëve të huaja, dhe transparencës së pronarëve përfitues të trusteve dhe marrëveshjeve të ngjashme ligjore.

Që nga vlerësimi i fundit në maj 2023, Maqedonia e Veriut ka përmirësuar nivelin e saj të përputhshmërisë me standardet e FATF. Të vlerësuara më parë si “pjesërisht në përputhje”, të tre rekomandimet tani vlerësohen si “kryesisht në përputhje”. Megjithatë, përparimi në fushën e rregullimit dhe mbikëqyrjes së sektorit financiar (Rekomandimi 26) nuk ishte i mjaftueshëm për të përmirësuar vlerësimin, i cili mbetet “pjesërisht në përputhje”.

Nga një total prej 40 rekomandimesh të FATF-së, Maqedonia tani ka:

• 31 rekomandime të vlerësuara si në përputhje ose kryesisht në përputhje;
• 9 rekomandime mbeten pjesërisht në përputhje.

Vendi do të duhet të paraqesë një raport të ri te MONEYVAL brenda një viti, i cili do të tregojë përparim të mëtejshëm në forcimin e masave për të parandaluar pastrimin e parave dhe financimin e terrorizmit.