Ministrja e Jashtme e Belgjikës, e cila nga janari kryeson BE-në: Zgjerimi nuk mund të ndodhë pa reformë të BE-së
Bashkimi Evropian nuk mund të zgjerohet pa reformë të brendshme të BE-së, tha ministrja e Jashtme e Belgjikës, Haxha Labib, në intervistën e sotme për të përditshmen belge “Le Soir”, pas kthimit nga Mali i Zi, Serbia dhe Kosova. Vizita e saj është në kuadër të presidencës së Belgjikës me BE-në, e cila fillon më 1 janar 2024, transmeton Portalb.mk.
Belgjika mbron pikëpamjen se rruga drejt zgjerimit duhet të lidhet me rrugën e reformave të brendshme të BE-së.
“Ka reforma që duhen zbatuar ose rrezikojnë të paralizojnë dhe përçajnë Evropën. Duhet të zbatohet paralelisht. Të dyja janë vërtet të nevojshme, zgjerimi nuk mund të shkojë pa reformën e institucioneve evropiane”, thotë ajo.
Ministrja nuk konfirmon datën 2030 për zgjerimin e dhënë nga presidenti i Këshillit të BE-së, Charles Michel, edhe pse ajo dhe Michel i përkasin Lëvizjes Demokratike, partisë liberale të frankofonëve të Belgjikës. Sipas saj, viti 2030 është vetëm një datë simbolike.
“Është mirë të vendosësh objektiva, por gjithashtu duhet të bësh progres real. Dhe është mirë të kesh anëtarësim progresiv. Vendet kandidate tashmë po marrin fonde për të reformuar veten, për të hapur ekonomitë e tyre, për të reformuar sistemin e drejtësisë, median etj”, shtoi ajo.
Funksionimi i BE-së është përballur me pengesa për mënyrën e vendimmarrjes në të cilën fjalën e kanë të 27 shtetet anëtare. Sipas Labibit, “reforma e Unionit është e nevojshme edhe pa zgjerim. Sot jemi përballur me pengesa, ndaj duhet të jemi më të shpejtë, më të shkathët në vendimmarrje. Jemi kritikuar sepse nuk mund të flasim me një zë dhe tashmë është e ndërlikuar në 27. Dhe çfarë do të bëjmë nesër me 33 apo 35 anëtarë? “Belgjika është në favor të votave të shumicës më të cilësuar për politikën e jashtme, për mbrojtjen e Evropës etj.”, thotë ajo.
Labib i referohet edhe raporteve të Komisionit Evropian (KE) dhe faktit që sot të gjithë sytë janë te Ukraina dhe Moldavia, ndërsa vendet e Ballkanit prej 20 vitesh presin një përparim konkret drejt BE-së. Mali i Zi shpreson të bëhet anëtari i 28-të i BE-së në vitin 2028, por rruga e Serbisë është e bllokuar sepse Beogradi nuk i bashkohet sanksioneve evropiane kundër Rusisë.
Ministrja specifikon se Belgjika ende nuk ka një qëndrim të caktuar nëse do të mbështesë fillimin e negociatave me Kievin, siç këshillohet nga KE në raportin e 8 nëntorit.
“Nuk është vendosur ende”. Në çdo rast, do të jetë një konsensus në nivel evropian. Dhe, nën presidencën tonë, ne do të duhet të veprojmë si ndërmjetës, të bëjmë kompromise, puna jonë do të jetë të bashkojmë pikëpamjet e të gjitha 27 vendet e BE-së”, thotë Labib.
Kujtojmë se në fjalimin e tij nga Parlamenti Evropian, kryeministri bullgar Nikolaj Denkov komentoi marrëdhëniet e vendit të tij me Maqedoninë, duke kujtuar se Bullgaria është vendi i parë në botë që e njeh vendin tonë si shtet të pavarur evropian.
“Për fat të keq, me kalimin e viteve marrëdhëniet tona janë përkeqësuar dhe nuk mendoj se Bullgaria është fajtore për këtë. Prandaj dua të them qartë se Bullgaria aktualisht nuk ka kërkesa të tjera ndaj Maqedonisë së Veriut, përveç atyre që janë vendosur në vendimin e Bashkimit Evropian vitin e kaluar”, përfundoi Denkov, raportojnë mediat bullgare, duke theksuar se Maqedonia e Veriut duhet ta përmbushë marrëveshjen.
Ndërkohë më 18 gusht 2023 në Kuvendin e Maqedonisë së Veriut debati për fillimin e ndryshimeve kushtetuese mbaroi brenda pak orësh. Votimi nuk dihet ende kur do të bëhet.
Në mënyrë që të bëhen ndryshimet kushtetuese duhet dy e treta e votave, konkretisht 80 vota nga gjithsej 120 deputetë në Kuvend.
Partia më e madhe opozitare VMRO-DPMNE është deklaruar se nuk do t’i mbështesë këto ndryshime, ndërsa edhe nga opozita shqiptare kanë kushtëzuar që nuk do t’i votojnë ndryshimet nëse nuk ndryshohet definimi i 20% për gjuhën shqipe në Kushtetutë.
Ndryshimet kushtetuese nënkuptojnë shtimin e bullgarëve dhe kombeve tjera në Kushtetutë.
Kjo vjen si rezultat i asaj që Maqedonia e Veriut pas 17 vitesh me 19 korrik të vitit 2022 filloi bisedimet qasëse me BE-në me mbajtjen e konferencës së parë ndërqeveritare.
Megjithatë, negociatat nuk do të fillojnë derisa të bëhen ndryshimet kushtetuese. Nëse nuk bëhen ndryshimet kushtetuese deri në nëntor të këtij viti, procesi eurointegrues i RMV-së rrezikon të bllokohet përsëri.