Mbi 42.000 njerëz në rrezik përmbytjeje pas shembjes së digës në Kherson, kulmi i derdhjes së ujit pritet sot

By N. D. On 07/06/2023 10:55

Diga Nova Kahovka, e sulmuar nga forcat ruse, 6 qershor 2023. Foto nga Zelenskiy Resmi/AA

Mijëra njerëz janë larguar nga shtëpitë e tyre të përmbytura dhe niveli i ujit pritet të vazhdojë të rritet pasi diga kyçe në rajonin jugor Kherson u shkatërrua dje, për të cilën Rusia dhe Ukraina fajësojnë njëra-tjetrën. Kombet e Bashkuara kanë paralajmëruar se shkalla e vërtetë e katastrofës do të bëhet e qartë vetëm në ditët në vijim, transmeton Portalb.mk.

“Mijëra njerëz në Ukrainën jugore përballen me humbjen e shtëpive dhe strehimoreve të tyre dhe mungesën e ushqimit dhe ujit të sigurt”, tha Martin Griffiths, shefi për ndihmë humanitare i Kombeve të Bashkuara.

Evakuimet masive vazhduan mëngjesin e sotëm përgjatë lumit Dnieper, ndërsa u shfaqën pamjet satelitore të shkatërrimit. Një nga fotot tregon një port të përmbytur dhe një zonë industriale në kryeqytetin rajonal Kherson, i cili u çlirua nga ukrainasit vitin e kaluar.

“Në total, më shumë se 40,000 njerëz do të duhet të evakuohen: 17,000 në bregun perëndimor të Dnieper dhe 25,000 në bregun lindor, i cili është i pushtuar nga Rusia”, tha zëvendësprokurorja e përgjithshme e Ukrainës, Viktoria Litvinova.

Diga Kakhovka, pas së cilës është një liqen i madh artificial, siguron ujë për banorët dhe fermerët në rajonin më të gjerë, si dhe për termocentralin bërthamor të Zaporozhye, për të cilin autoritetet thanë se nuk ishte në rrezik. Është gjithashtu një kanal jetik që çon ujin në gadishullin e aneksuar të Krimesë.

“Kulmi i derdhjes së madhe të ujit nga rezervuari pritet të mërkurën në mëngjes. Më pas do të vijojë një periudhë stabilizimi, pas së cilës uji pritet të tërhiqet shpejt për katër-pesë ditë”, paralajmëroi mbrëmë menaxheri i hidrocentraleve ukrainas “Ukrhydroenergo”.

Mbetet e panjohur se çfarë e shkaktoi thyerjen e digës, por inteligjenca ushtarake ukrainase pretendon se Rusia e hodhi në erë qëllimisht atë për të ndaluar një kundërofensivë të pritshme ukrainase. Nga ana tjetër, Rusia pretendon se shkatërrimi i digës është rezultat i granatimeve të Ukrainës.