Kuvendi konfirmon: Ligji i lojërave te fatit nuk ka marrë mbështetje te mjaftueshëm nga deputetët dhe nuk është miratuar
Edhe pse dje MIA publikoi informatën se Kuvendi i Maqedonisë së Veriut i miratoi ndryshimet në Ligjin për lojërat e fatit dhe lojërat argëtuese. Mirëpo sot Kuvendi njoftoi se në fakt ligji nuk është miratuar, transmeton Portalb.mk.
Ligji për lojërat e fatit dhe lojërat zbavitëse në leximin e tretë të vazhdimit të pasdites së djeshme të seancës së 145-të nuk mori shumicën e kërkuar prej 61 votash dhe procedura për këtë ligj përfundon, sqaroi sot Kuvendi.
“Duke pasur parasysh Vendimin e Gjykatës Kushtetuese U. nr. 115/2019, datë 14.05.2020, sipas të cilit për miratimin e Ligjit nevojiten së paku 61 vota “PËR”, me rastin e vendosjes për Ligjin për lojërat e fatit dhe lojërat zbavitëse, në seancën e 145-të, Ligji ka marrë mbështetjen e 51 votave “PËR”, që do të thotë se nuk janë plotësuar kushtet që ligji të miratohet dhe procedura sipas atij ligji përfundon”, thekson Zyra e Kryetarit të Kuvendit.
Siç thuhet nga Kabineti i Mitreskit, “konstatimi i kryetarit të Kuvendit me rastin e vendosjes për Ligjin për lojërat e fatit dhe lojërat zbavitëse ka të bëjë me shumicën e nevojshme për miratimin e këtij ligji në procedurë të rregullt”.
Ligji për lojërat e fatit dhe lojërat zbavitëse njëherë u miratua nga Kuvendi, por kryetari i shtetit Stevo Pendarovski nuk nënshkroi dekretin për të dhe i është kthyer deputetëve në lexim të tretë.
Sipas propozim-ligjit për ndryshimin dhe plotësimin e Ligjit për lojërat e fatit dhe lojërat argëtuese, i miratuar me 7 shkurt nga Kuvendi i RMV-së, lokalet afariste në të cilat organizohen lojërat e fatit në një bastore dhe në klubin e automateve, lotaria në ambiente të mbyllura dhe lojërat elektronike të fatit duhet të vendosen në një distancë prej jo më pak se 500 metra nga shkollat fillore dhe të mesme.
Lëvizja Antibixhoz disa herë ka organizuar protesta për largimin e objekteve të lojërave të fatit nga vendbanimet por kanë kërkuar edhe mbylljen e plotë, por pavarësisht ngritjes së zërit, autoritetet deri më tani nuk i kanë zbatuar kërkesat e tyre.