Gjatë natës janë kryer 13 intervenime nga Ndihma e Shpejtë në Trubarevë, një person është transportuar në Toksikologji
Gjatë natës së kaluar deri në orët e pasdites, në rajonin e Trubarevës janë realizuar 13 intervenime nga Ndihma e Shpejtë, gjatë të cilave një person është transportuar në spital dhe është bërë transporti në një vendbanim tjetër i një personi të palëvizshëm, transmeton Portalb.mk.
“Ministria e Shëndetësisë po e ndjek nga afër situatën dhe sistemi shëndetësor është i mobilizuar për t’u përballur me sfidat e reja që janë shfaqur. Nga ndërhyrjet e kryera nga Ndihma e Shpejtë, vetëm një person është transportuar në një institucion publik shëndetësor, në Klinikën për Toksikologji. Po ashtu, shtabi i krizës që e formuam menjëherë si Ministri, është duke zhvilluar mbledhje të vazhdueshme dhe në periudhën në vijim do të ndërmerren masa të përshtatshme në përputhje me rrethanat”, deklaroi ministri Aliu.
Drejtori i Klinikës për Toksikologji, Argjend Imeri, informoi se pacientja që është pranuar gjatë natës në Klinikën për Toksikologji, është në gjendje të mirë.
“Pacientja ka pasur edhe simptoma të tjera shoqëruese dhe për këtë arsye është mbajtur në trajtim, por më e rëndësishmja është se ajo ndodhet në gjendje të mire shëndetësore. Gjatë ditës së sotme edhe tre pacientë të tjerë janë kontrolluar në mënyrë ambulatore në Klinikë dhe janë lëshuar në shtëpi”, theksoi Imeri.
Ajri në Trubarevë është shumë i ndotur për shkak të zjarrit që shpërtheu më 13 shtator në objektin e firmës “F-Grupacioni” e cila merret me mbeturina elektronike, janë përfshirë edhe dy objekte në të cilët ka pasur sasi e madhe e mbeturinave plastike. Nuk ka të lënduar në zjarr, deklaroi drejtori i Drejtorisë për Mbrojtje dhe Shpëtim (DMSH) Stojançe Angellov. Ai shtoi se nga perceptimi në terren, bëhet fjalë për vënie të qëllimshme të zjarrit.
- LEXO: Mexhiti: Mostrat e ajrit nga zjarri në Trubarevë po testohen në katër institucione, janë marrë edhe disa masa të tjera
- LEXO: Angellov: Nuk ka të lënduar në zjarrin në Trubarevë, nuk lejohet përhapja e tij
Ndryshe, kohëve të fundit, janë raportuar zjarre edhe në shumë deponi, si në Drislla, ajo pranë fshatit Kuklish në komunën e Strumicës, deponia Dellçevë, deponia e qytetit në Komunën e Krushevës, si dhe deponia Vardarishtë në Komunën Gazi Babë. E gjithë kjo kulmoi me zjarrin në Trubarevë.
Mjekët në vend paralajmërojnë se pasojat në shëndetin e njeriut nga toksinat që shkaktohen nga djegia ose tymi i deponive janë të mëdha. Kjo situatë mund të shkaktojë sëmundje të mushkërive dhe zemrës, si dhe anemi.