Eqrem Basha: Baladë për njeriun që nuk e njihte bota
BALADË PËR NJERIUN QË NUK E NJIHTE BOTA
mëngjes për mëngjes botës i drejtonte letra
në adresa të imagjinuara me imazhe të paqarta
dhe i ngjiste mbi to pullat e vuajtjes së vet
njeriu që nuk e njihte bota
binte e ngrihej duke u prezantuar
me duar përpjetë thërriste idhujt e vet
endej stacioneve ‑ priste miq që s’i vinin
njeriut që nuk e njihte bota
çdo ditë me të ngrysur para portës
priste postierin t’i kthente përgjigjet
e letërkëmbimit me ikset e botës së largët
njeriu që nuk e njihte bota
mesazh pas mesazhi ‑ fjalë e porosi
mbi makinën e tij kurrë skrramë pluhuri
as merimangat s’qetësoheshin në dhomën
e njeriut që nuk e njihte bota
dhe një ditë iu sos jeta ‑ nuk kishte më ngjyrë
iu tha bishtpena ‑ s’i rrihte makina
‑ kush është ky fatzi thanë kur e gjetën
njeriun që nuk e njihte bota
e varrosi ndërmarrja për punë funerale
e vuri në varr me një rrasë përsipër
në adresën e tij erdh letra e vetme
fatura e varrimit
të njeriut që nuk e njihte bota
(Atleti i ëndrrave të bardha, Rilindja, Prishtinë, 1982)
Autor i poezisë është Eqrem Basha poet, tregimtar, romansier.
Ka lindur në Dibër. Ka studiuar gjuhë e letërsi shqipe në Universitetin e Prishtinës. Një kohë ka punuar gazetar, pastaj redaktor në Televizionin e Prishtinës.
Basha është një nga themeluesit e shtëpisë botuese “Dukagjini” nga Peja. Është anëtar i Akademisë së Shkencave dhe të Arteve të Kosovës. Ka botuar 10 libra me poezi, pesë me tregime dhe katër romane, ka shkruar skenarë filmi e televizioni. Ka përkthyer nga frëngjishtja (Malraux, Sartre, Camus, Beckett, Ionesco, Lévi-Strauss, etj.) italishtja (Ungaretti) dhe gjuhët sllave. Më 1999 Fayard botoi një libër me tregime të zgjedhura në frëngjisht, më 2018 Non Lieu romanin e tij Lakorja e Ik’sit. Përmbledhje me poezi janë botuar në frëngjisht (Voix d’encre), polonisht (Pogranitze), anglisht (Gjonleka, Nju Jork), serbisht dhe esperanto. Tregimet dhe esetë janë prezantuar në revista e antologji në Europë e SHBA, poezia është përkthyer në shumicën e gjuhëve evropiane, por dhe në arabisht, hebraisht, japonisht, vietnamisht, etj. Jeton në Prishtinë.